المصالح تحكم العالم

المصالح تحكم العالم

بقلم: حنان حامد

انا مش بحب اتكلم في السياسة ومش من هواة الجدل ولا التحليل بس اللي موجود على الساحة دلوقتي صعب يتشاف ونسكت علشان نفهم اللي بيحصل.

لازم نبص للصورة الكبيرة مش للأحداث المنفصلة امريكا عمرها ما كانت بتتحرك بعشوائية ولا بدافع الاخلاق زي ما بتحب تروج لنفسها هي بتتحرك بخطط طويلة المدى محسوبة بدقة ومبنية على المصالح ومصالح حلفائها في اوروبا.

اي دولة عندها بترول او موقع استراتيجي مهم بتتحط تلقائي تحت المراقبة ولو القرار السياسي فيها حاول يطلع بره الخط المرسوم يبدأ الضغط بكل الاشكال الممكنة عقوبات اقتصادية تشويه اعلامي دعم معارضات افتعال ازمات داخلية وبعدها تدخل مباشر او غير مباشر تحت مسميات كلها جميلة لكن مضمونها واحد.

اللي حصل مع فنزويلا مش حالة استثنائية فنزويلا واحدة من اغنى دول العالم في احتياطي البترول ومع ذلك شعبها بيعاني معاناة شديدة لان القرار هناك حاول يكون مستقل وما يخضعش للهيمنة الامريكية فكان لازم النموذج ده يتكسر علشان ما يبقاش مثال يتكرر فبدأ الحصار والتجويع والضغط السياسي لحد ما البلد تضعف ويتفتح الطريق للسيطرة على ثروتها.

امريكا واوروبا عندهم مراكز ابحاث ومخابرات شغالة طول الوقت على توقع الصراعات قبل ما تحصل بسنين وخصوصا في الدول العربية اللي فيها بترول لان المنطقة دي شريان الطاقة للعالم كله ومش مستعدين يسيبوها في ايد قرارات مستقلة كل حرب شفناها في منطقتنا كان قبلها تمهيد اعلامي وضغوط اقتصادية .

وكلام منمق عن ديمقراطية وحقوق انسان وبعد ما الدولة تضعف تبدأ مرحلة السيطرة الحقيقية
الفكرة كلها ان البترول مش مجرد مورد طبيعي ده اداة قوة اللي يسيطر عليه يقدر يفرض كلمته على الاقتصاد العالمي.

علشان كده اي دولة تحاول تستخدم ثروتها لصالح شعبها بعيد عن المنظومة الغربية بتتحاصر وتتجر لدواير صراعات داخلية واللي بيدفع التمن في الاخر دايما هو المواطن البسيط.

اللي لازم نفهمه ان اللي بيحصل مش صدفة ولا مؤامرة عشوائية دي سياسات ثابتة بتتكرر بنفس الاسلوب مع اختلاف الاسماء والاماكن والعنوان دايما واحد السيطرة على الموارد والتحكم في القرار حتى لو كان الثمن خراب دول كاملة وانتزاع الامان من شعوبها