البنت لما بتحب بتدي
بقلم. يوحنا عزمي
البنت لما بتحب بتدي..
بتدي من غير ماتفكر هتاخد إيه
كلمه صغيره ممكن تطلعها لسابع سما
وإهمال بسيط ممكن ينزلها لسابع ارض
ولما بتحس بالحب الحقيقي من الشخص اللي اختارته
عشان تحس معاه بأجمل مشاعر ممكن البنت تحسها
بتبقي مستعده انها تجبله الدنيا وما فيها
عشان بس تحس في عينيه رضا.. وحبه ليها يزيد
مهما كانت من اقوى المخلوقات
بتبقي أضعف حد قدام اللي بتحبه..
البنت طيبه جدا …
وسهل انك تراضيها حتى لو بورده او بكلمه
بس وقت مابتستقوي مايهمهاش اي حد في الدنيا
ومابتبقاش شايفه حاجه قدامها وبتدوس على كل اللي يجي عليها..
بلاش تجبرها تطلع كل القوة اللي جواها وتستخدمها ضدك
البنت معروف انها أضعف من أضعف مخلوق ع وش الارض
بس جواها قوة لو طلعت بعد غلب وتعب
ممكن تدمر الكون كله.. فمتستقلش بالبنت..
البنت تركيبه عجيبه جدا..
مايفهمهاش غير اللي خالقها وبس
البنت مابتنكسرش من علاقه
الا لما بتبقى عملت كل حاجه في ايديها عشان تحافظ على العلاقه دي ..
قدمت كل الممكن والمستحيل عشان العلاقه دي تتم
اتحملت فوق طاقتها واستهلكت كل مشاعرها عشان الشخص اللي بتحبه .. وكانت على استعداد تواجهه وتحارب اي ظروف ممكن تمنعهم عن بعض..
البنت مابتنكسرش من علاقه ..
الا لما تقدم كل اللي قدرت عليه عشان تسعده
واتجاوزت عن أخطاء كتير ومواقف كتير
وجت على نفسها في مواقف كان لازم وقتها ماتفكرش غير في نفسها ..
البنت لما بتحب بجد .. بتبني حياة كامله في خيالها
بترسم عالم تاني .. وتفضل وراه بكل اللي تقدر عليه
عشان يتحول من رسم وخيال .. لواقع .
البنت لما بتحب.. بتتحمل كلام ناس ممكن يشككوا في سمعتها واخلاقها ..
بتتحمل ضغوطات كتير ممكن تمر عليها في البيت لو الموضوع كان رسمي ..
الحب اول حاجه ممكن يكسر قلب بنت حبت بجد
لأنها كيان عاطفي بطبيعتها ..
وكمان لما بتتعب وتضحي وتتحمل مسؤلية علاقة
بتضيع كل طاقتها ومشاعرها في سبيل العلاقه دي
وفي الاخر العلاقه تنتهي ..
اكيد بتحس بكسر وحسره وهزيمه ..
مش بس قدام نفسها.. لكن حتى قدام الناس كلهم
وارد بعد الانكسار تقوم وتعافر .. وتكون افضل من الأول
ووارد بعد الانكسار تكمل حياة كلها خوف ورهبه من الناس
لكن في الحالتين هتتحول .. هتتحول تماما لشخصيه تانيه
مالهاش علاقه بيها لا في التصرفات ولا الأفكار ولا حتى في المشاعر ..
يأدوب كل اللي يجمعها بشخصيتها القديمه ملامح مش اكتر
البنت ما بتنكسرش.. إلا لما بتكون راجل في كل تصرفاتها مع علاقتها بالشخص اللي بتحبه.. اللي في الاخر يطلع عيل.
