الدكتور فوزي الحبال يكتب “انتبهوا ايها السادة من سلالة فيروس كاورونا الجديد”

كتب دكتور فوزي الحبال ( 3 )
المقال السابق تحدثا عن خطورة الفيروس الجديد، ومدي السيطرة عليه وتأثيره علي الاطفال واليك اهم 2 سيناريو.

السيناريو الاول، الناس هتستمر في الاستهانة بالموضوع و في اقناع نفسهم ان الموضوع بعيد عنهم و هيستمروا في الاهمال و التعامل مع الموضوع على انه حرب اعصاب وانه بعيد عننا وان الوفيات قليلة وان الشباب بعيدة عن كل ده و انهم انصح من كل اللي حواليهم .
السيناريو ده هيكون معناه ان اللي هيتصاب هيعدي كل بيته و جيرانه واصحابه، و حتى اللي واخد احتياطاته هتبقى معركته اصعب و حمايته اصعب والمصيبة لو الناس استمرت تنزل زيارات منزلية وأعياد و تجمعات .
السيناريو ده معناه ان في لحظه واحده البلد بتصحى على مئات الآلاف من المختنقين، التهاب رئوي حاد، الفيروس بيدمر الحويصلات الهوائيه .
مئات الآلاف يتدفقون على المستشفيات وكلها امتلأت، كل ما يمكن تحويله لمستشفى امتلأ، ثم نبدأ المستشفيات الميدانية في خيام، ثم نشاهد كل غرف العناية المركزة امتلأت وكل أجهزة التنفس الصناعي، ثم كل أقنعة الاوكسجين .
ثم تأتي لحظة قرارات اختيارات الحياة كالحروب تماماً. بشكل ميداني و تطوير بروتوكول ان كل من عمره فوق 65سنة، وكل الي تحت وعنده حالة مرضية مصاحبة يسيبوه يختنق حتى الموت، ثم مرحلة انهيار الاأطباء وبكاء وهم يبلغون المرضى أنه لا يتوافر لهم حتى قناع اوكسجين .
الناس تموت على أبواب المستشفيات، نسب الوفاة ترتفع يومياً ثم تسجل مصر النسبة الاعلى عالميا .
السيناريو الثاني ان الناس تفهم خطورة الموقف الحالي، وان هناك انفجار حالات حدث خلال الاسبوع السابق وان الناس تفهم بعضها و اللي عارف يقول للي مش عارف و اللي فاهم يقول للبسيط، وكل واحد يسيطر علي اسرته وعياله و اللي عنده سلطة ينفذها و يجبر الناس اللي يقدر عليهم انهم يلتزموا .
السناريو ده هو سيناريو الوعي، ده نفس السيناريو اللي اطبق في الصين، نفس السيناريو اللي خلى مقاطعة ووهان اللي كانت هي المنبع انها تحتفل انها خالية من الفيروس، وكمان كوريا الجنوبيه سيطرت بدرجه مزهله .
الموضوع حسبته بسيطة الفيروس مدة احتضانه 14 يوم لو سيطرنا على نفسنا كمجتمع الفترة القادمة 3 اسابيع الازمة المنتشرة دلوقتي هتقل لان لو كله التزم، المصابين هيبقو محدودين و يبقي سهل يلاقو رعايه و يخفو، و اللي بيحافظ على نفسه تبقى مهمته اسهل عشان كل اللي حواليه فاهم و بيتعاون .
دورك دلوقتي انك تختار السيناريو المناسب ليك،لو ليك اي سلطة او صوتك مسموع وصل صوتك و عرف اللي حواليك ان المعركة عايزة كل شخص، لو انت يوتيوبر او ليك متابعين على السوشيال ميديا كلم اللي عندك و عرفهم ان مافيش حاجة اسمها ناس، و ناس، لا في المعركة دي، لو عندك حد لسه مقتنع ان الموضوع بعيد عنه وانه الموضوع مش مستاهل كل ده او انه بعيد عننا فهمه ان الكلام ده مش حقيقي .
وان المستشفيات مليانة وفي صعوبة شديدة ان في حد يلاقي مكان وان العزل المنزلي كثير جدا لكثرة الحالات وان الفرق الطبية قربت على مرحلة الانهيار وان كل يوم دلوقتي بنفقد ثلاثة من الفرق الطبية .
و ان موقفه السلبي ممكن يتسبب في عدوى لولاده او بيته او زمايله في الشغل .
احنا دلوقتي في مرحلة الإختيار اللي اتحطت فيه كل الدول اللي قبلنا، و مع انه هو نفس الفيروس، لكن كل دولة حصل فيها حدوتة مختلفة على حسب رد فعل شعبها و هل فهموا ووقفوا مع بعض و قاوموا الجهل و قاوموا الاهمال ولا لأ .
فاتقوا الله في انفسكم وفي ذويكم حفظنا الله أجمعين من كل شر وسوء .
حفظ الله مصر وشعبها وجيشها العظيم وقائدها و جيشها الابيض .
والي اللقاءفي المقال رقم ( 4 )