الساحل الشمالي… مصيف الأغنياء أم ساحة الانحلال؟

بقلم: حنان حامد
زمان كنا نسمع عن الساحل الشمالي كأنه جنة في الصيف: بحر هادي، هواء نضيف، ناس رايقة.
دلوقتي بقى اسمه مرتبط بـ الانحلال والفشخرة والتباهي… وكأن اللي معاه فلوس لازم ينسى نفسه وربنا علشان يعيش “الحياة”.

فشخرة على الفاضي

أول ما توصل، تشوف عربيات بملايين، ناس بتاكل أكل أغلى من مرتب شهر، هدوم كلها ماركات، صور في كل حتة، والمفاجأة؟
كل ده مش علشان المتعة… علشان بس “الناس تشوف”.

لبس خادش… وسلوك منحط

البنات نازلين بشواطئ كأنهم في عرض تعرّي، والشباب بيعملوا حاجات لا أخلاق ولا دين يرضى بيها.
الضحك بصوت عالي، الرقص لحد الفجر، الكحول والمخدرات بقت عادي… وكل ده قدام عيال صغيرين بيتعلموا ويقلدوا.

إحباط حقيقي

لو إنت إنسان بسيط ورايح تقضي يوم، هتحس إنك غريب… كأنك مش من الكوكب ده!
هتحس إنك قليل لأنك مش لابس ماركة، ولا بتاكل في مطعم فخم، ولا معاك عربية فارهة.
وده أخطر شيء: إننا بقينا نحبط بعض باسم التباهي.

الخلاصة

اللي بيحصل في الساحل مش حرية… ده انهيار أخلاقي وابتعاد عن الدين.
بقى فعلاً كأنه مقر للشياطين، صوت عالي، لبس خادش، صرف فلوس في الحرام، وسعادة وهمية.

الفلوس مش عذر للفساد… والحرية عمرها ما كانت قلة أدب.

“الساحل محتاج ينضف… مش من الرمل، من العقول والنوايا.”

نقدم لكم من خلال موقع (الرأى العام المصرى )، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.