بقلم /نقيب خالد عفيفي
ويجرى العمر ويسافر…
بدون ترتيب
وتنسانا حاجات حلوة…
وحاجات بتغيب
ونلقي ضهرنا الواقف…
بقي محني
ونلقي نفسنا فجأة….
ملانا الشيب
أمانة يا بني… يوم ما أكبر
تكون فى الشدة دى…جملي
ويوم ما أحزن… تكون عيدي
ويوم أضعف… تكون أيدى
ويوم ما أيأس… تكون أملي
أنا اللي فى الصغر… شيلتك
وأنا اللى بدمي كبرتك… وشوفت الويل
ومهما يا بني كان شيلتك على كتافى… وف عينيا شيلها شيل
خدتنى الدنيا 100 لفة…وملتني جراح
وعشت الدنيا بتكفى…عشان ترتاح
عشان مااشوفكش فى يوم عايز…وأنا عاجز
تضيق الدنيا فى عينيا
لكن فى عينيك اشوفها براح
أمانة يا بني …
تبقى يوم عشى
وأكون فى العش دة طيرك
ما تحوجنيش فى يوم ابدا
ل حد فى دنيتي غيرك
وتبقى فى ضلمتى نورى
وتبقى الصحبة واللمة
وتبقى فى مرضى دكتوري
وتبقى الحضن والضمة
وتبقي فى دنيتى حضورى
وليك جوة القلب خانة
تكمل فى الحياة… دورى
بصدق وطيبة وأمانة
ويوم ما الدنيا تكسرني
تكون فى السكة نور عينى
ويوم ما الموت يختارني
تكون دعوة تنور قبري فى موتى
زمااااااان يا بني…
زمان…. كان الضعيف انت
وأنا باستقوى من أجلك
وبكرة أكبر قوى… وأضعف
وأكون فى الضعف محتاجلك
أمانة عليك يا بني
لما أكبر ما توجعنيش واوعى مرة بدموعي تبيتني
وخد بالك من الكلمة ماتجرحنيش
دا أبسط كلمة لو جارحة تموتني
دا أنا لو هلمح ولو ثانية… ف نن عينيك
بأني بقيت… تقيل الحمل لحظة عليك
ساعتها الموت… يكون أهون اووى عليا
بلاش يا ابني تموتنى فى يوم ب إيدك
أمانة يا بني… يوم ما أكبر
وتفضى الدنيا… حوليا
ويهرب… كل شىء منى
ويضعف… كل شىء فيا
تشيلني فى قلبك الطيب
وما تسبنيش… منين ما تكون
وتبقالي السند… يا بني
وتبقالي الأمان… فى الكون
أمانة يا بني… من فضلك
تكونلي ساعتها…. أب حنون
❤️? وعجبى❤️?
