النداله وقلة الأصل اسلوب حياة لبعض الناس

بقلم :د فوزي الحبال

قال الله تعالي { وَإِن يُرِيدُواْ خِيَانَتَكَ فَقَدْ خَانُواْ اللّهَ مِن قَبْلُ } [الأنفال 71] .
كلنا نحلم بالعيش في المدينة الفاضلة بس إحنا فى دنيا مش فى جنة يعنى لازم حتقابل الخير و الشر ، الحلو و الوحش، الندل و الجدع .
للأسف الشر بقى أكتر فى اليومين اللى ما يعلم بيهم إلا ربنا ، بس برده ما زال الخير فى أمتى إلى يوم الدين ، وأصل الدنيا إن فى النهاية الخير حينتصر إن شاء الله ، إنك تكون جدع ده مش هبل ده قمة الرقى ، قمة النضج ، بس خليك جدع مع الجدع و تجاهل الندل ، و إعرف إن الندالة دى مش بس صفة إنما مرض إجتماع نفسى ، فتعامل الشخصية الندلة على إنها شخصية مريضة ، وعلشان متتعداش إبعد أحسن، و إفتكر دايما و إنت بتبعد إنك بتكف أذى عن نفسك و إن البعد مش معناه إنك عبيط لا سمح الله، إنما إنت عاقل كفاية إنك تدخل فى صراعات مع حد مريض نفسى .
يعنى هو ينفع واحد مجنون يقولك يا عبيط و إنت تقف تتناقش معاه ، ما هو إنت لو عملت كده حتبقى فعلاً عبيط و مجنون زيه .
نعم فى ناس في قمة الندالة، و بيبقى قلة أصل ووطو منها اللى بتعمله معاك ، إنما برده جزء كبير من الندالة دى عقد و كلاكيع نفسية ، و علشان كده البعد عن الناس اللى بالشكل ده بيبقى غنيمة و مكسب كبير، مكسب فى راحة البال و المحافظة على الأعصاب و إياك و الثقة فيهم ، يعنى بجد لو حد ندل معاك مرة ، إتاكد مليون فى المية إنه حيندل معاك مليون مرة، يعنى بصراحة لو ما إتعلمتش تبعد من أول مرة، تبقى دى غلطتك و إستحمل فيضان الندالة اللى حينهال عليك، فى ناس بتسمى الندالة روشنة أو بتحس إنها لما تندل بتبقى مميزة، بس زى ما قلتلكم قبل كده ده مرض نفسى، لا تسمح لحد مريض إنه يلعب بيك، و إلا حتلاقى نفسك عايم فى بحر الغدر والنداله .
كام مرة فى حياتك عاملت حد بكل ضمير و إخلاص و بما يرضى الله و لقيته فى الاخر بيعض الإيد اللى أتمدله، كام مرة وثقت فى حد وفي الاخر باعك، و لا كام مرة إديت الأمان لحد و أول ما أتعلم يخون، إتعلم يخونك إنت، و كام مرة صعبت عليك نفسك من كتر التضحيات اللى عمال تعملها مع ناس متستهالش حتى تبص عليها .
الإجابة كتير أوى طيب إيه اللى إتعلمته من التعامل مع الناس النادلة و الخسيسة اللى إنت عمال تخبط فيها طول ما إنت ماشى، بتفضل تلوم نفسك و تحط عليها أكتر و أكتر و تحمل نفسك فوق طاقتها، و تفضل تجيب الغلط كله عليك وتفتكر ده الحل، حل إنك قابلت واحد و لا واحدة غلط فى حقك، ومطلعش قد الثقة هى إنك ترمى حمول بزيادة عليك، أكيد لا مش ده الحل، طيب إيه الحل .
الحل إنك تنتقم من العمل فيك كدة، أكيد ده كمان مش الحل، طيب إيه ممكن يكون الحل .
الحل عند اللى خلقك، اللى عنده كل حاجة محسوبة بميزان، اللى مش بيغفل عن أى حاجة فى الكون، أيوة سيب ربنا ياخدلك حقك، و توكل على الله بس لحظه من فضلك، مش معنى كده إنك تبقى أهبل و ملطشة لأى حد و لا تسكت على حقك، إنما إتعلم من كل موقف ندالة تمر بيه، و إتعلم حاجتين مهمين جدا، التجاهل و التعايش، يعنى إتجاهل أى حد يعملك حاجة و علم عليه علامة كبيرة اوى علامة قادرة إنك تبعده عن حياتك بالدرجة اللى جرحك بيها و أذاك فيها و التعايش إنك عارف تعيش و تتعايش حتى لو الظروف حطيتك إنك لازم تتعامل مع الشخصية الندلة دى كل يوم، فإنت حتعرف تتعايش معاها و مش حتسمح بوجودها فى دايرتك إلا فى الحتة الصغيرة الضلمة اللى إنت عايزاها تكون فيها .
قليل الأصل هو شخص لا يمكن أن نثق به، ولا تأتمنه على سر، فهو خائن لا يقدر الجميل أو المعروف، وليس له ضمير، لا يفهم شيء عن الأصول أو القيم الحميدة، هو شخص انتهازي، يحاول استغلال الفرص والظروف امثال معتز مطر وايمن نور ومحمد نصر ومحمد علي وغيرهم من الجماعه الارهابية، قليل الاصل لا تعتبه ولا تلومه ده زى البقعه لا بيطلع بربسو ولا بأمو عتاب الندل اجتنابه .