حادث الاسماعيليه

حادث الاسماعيليه ..

رؤيه .. مصطفي العموري

 

.. مش عارف بكل صدق وصراحه ابدء ازاي ولا منين من فظاعه المشهد مش عارف اركز .. وزي غيري كتير مصدوم ومش عارف اعبر ولا اكتب .. قلبي جوايا مكسور ومعصور وذهني شارد م الذهول ..

واياك اسمع حد يقول ان ده واحد كان مثلا مغيب او مسطول او حتي مجنون .. كلمه واحد او شخص معناها انه انسان وده مش كلام يصح انه عليه يتقال .. وانا هحاول اقول الحقيقه وبكل صدق بدون م انافق ولا اكدب ..

اللي حصل ده مجرد دق لناقوس الخطر ده شئ كان متوقع بعد م غابت من مجتمعنا القيم ومن التعليم غابت التربيه والاخلاق والادب ومن المناهج اتشالت وحذفنا بايدنا الدروس والعبر ..

مفيش داعي نستغرب لازم نتشجع ونواجه ونعترف بغلطنا .. ونقف للحظه ونراجع انفسنا .. دي ممكن تكون بس يادوب البدايه وبسبب الفن الهابط ممكن نشوف كتير وتتكرر الف مره قدام عيونا نفس الحكايه ..

 

ارجوكم يا فنانين ارحمونا تعبتونا و تعبتو الناس

مبتركزوش غير ع البلطجه والقتل والجنس والاسفاف !!!!

هضيعو اجيال المفروض ان احنا عليها حراس

ضيعتو الحب والحنيه والرحمه والاحساس

خليتوها بس بالدراع واللسان والقانون بينداس !!

والعدل والحق والخير مبقيش هو المقياس !!

هو ده اللي هنوصلو وهنشرب من نفس الكاس

هنخاف ع روحنا وع ولادنا وع بيوتنا هنقفل بميت ترباس

انتو والله السبب ف ظلم ولاد الناس

الضعيف هينداس والمحترم والطيب هيعيش محتاس …

 

ابراهيم الابيض وعبده موته والالماني

طلعو اجيال والله مجنناني

احنا ف وادي وهم ف وادي تاني

و مثلهم الاعلي بقي الاسطوره رفاعي .. !!

فتوات وشبيحه ومحدش بيهم داري ..

مناظر الدم والقتل بقيت بالنسبالهم شئ عادي

 

ومين السبب ؟؟ دولا يا مصر مش ولادي ..

الضحيه معروفه .. طب مين الجاني .. ؟؟

 

الكتاب والمؤلفين ..ولا المنتجين والممثلين ..

ولا المخرجين !!

ولا الدوله والرقابه ولا مين !!! ؟؟؟؟؟؟

ولا ولادنا وبس علشان هم المشاهدين ..

و هم برضه المتابعين !! بس هم مخيرين ولا مجبرين .. !!

ولا يمكن احنا علشان سكتنا وعملنا مش شايفين .. ووقفنا نتفرج وللاسف و احنا ساكتين كاننا متلجمين او متكتفين .. قتلتو الغيره والشهامه والنخوه اللي فينا مخلوقين و مخفيين بشويه مشاهد مغلوطين وذوق علينا دخيل .. خليتوها ولا الحيوانات واحنا والله بني ادمين .. فن هابط بيقدم بلطجيه ومجرمين ومدمنين .. وبيقولك ده الواقع بس انتو اللي مش عايشين ولا حاسين .. !!

 

طيب هو الواقع مفيهوش ناس تانيين .. مفيهوش محترمين ولا مؤدبين ولا ابطال ولا منقذين ولا صحابه و علماء ولا رجال دين ولا رموز و مصلحين ..

ولا قصص كفاح وقصص نجاح لناس كتيييير مصريين .. كانو مدفونين .. ووصلو للعالميه وبقيو ع الروس متشالين والكل ليهم خدامين والعالم والناس بانجازاتهم مبهورين ..

ولا التراث والتاريخ اللي بقصص البطوله مليانين …. !!!

ولا دولا مستخبيين و مداريين .. ولا انتو اللي عمي ومش شايفين ولا انتو مش متعلمين و دارسين ولا مش لاقيين .. ولا انتو تكونو قاصدين …!!! ؟؟؟؟؟

 

الحقيقه .. مفيش ف دماغكو غير الفلوس وازاي تطلعو كسبانين .. حتي لو هتمشو ورا الشيطان الرجيم ..

.. بس اعرفو انكم كده ف الارض مفسدين ..

ده يعني لو مكنتوش عارفين ولا فاهمين انتو بقيتو مين .. مع اني متأكد انكو عارفين بس مطنشين .. علشان المصلحه والملايين …..

طلعتو اجيال ضايعين .. ودمرتو مستقبلهم وخلتوه طين ..

واغلبهم اخرتهم هيبقو مساجين ..

 

.. ضيعتو جيل بتخاريفكم وتخلفكم ..و انتو اكيد شايفين عمايلهم بعيونكم .. وسامعين الفاظهم اكيد ب ودانكم .. والجرايم اللي بتحصل كل يوم قدامكم ..

امممم وصلتو كده لاوهاكم ووصلتو افكاركم !! .. حققتو كده احلامكم !! .. النتيجه طبعا فاقت خيالكم وتوقعاتكم …

ضيعتو مجهودنا وحطمتو ولادنا مش مسامحينكم

و منكم لله ده والله بسببكم ..

 

ارجعو عن الغلط وبلاش التكرار .. ارجعو للاخلاق والقيم باستمرار .. علمو ولادنا ان العدل بيقضي ع الاشرار وان اللي بيفوز هم الاخيار .. وان الظالم نهايته خراب و دمار ..

 

وافتكرو من زرع حصد وده واقع مش كلام .. ادوهم المثل والقدوه وحب الخير والعدل والايمان ..

وألا ……… ؟؟

والا .. استنو اللي جاي وهتوريكم الايام .. انكم لو مرجعتوش هتقولو ع الدنيا السلام .. ومش هيقيد الندم بعد التجاهل والاهمال والسير ف الطريق الغلط وكمان باصرار ..

ارجوكم بصو لقدام خلونا نطمن ع ولادنا ونحس بالامان ..

والرجوع و التغيير ممكن وسهل مهوش محال .. ودي رساله مني لمن يهمه امر القادم من الاجيال ..

 

ارجوكم شوفو ايه اللي عنه غفلنا

ارجوكم رجعولنا اللي اتسرق منا

اللى اتسرق من مصر مش مال أو دهب أو حتى طين ..

اللى اتسرق من مصر أخلاق وأدب وأصول ودين ..

اللى اتسرق احساس و قلوب ولادها الطيبين ..

اللي اتسرق فكر و عقول علماء و مفكرين ..

اللي اتسرق الخير اللي جوا البني ادمين ..

اللي اتسرق عادات وتقاليد و اخلاق كنا عليها متربيين ..

اللي اتسرق روحنا وتاريخنا واحنا بقيينا بلا هويه عايشين ..

 

اللي اتسرق قيمه وكيان وبقينا تايهين وضايعين … حد يعرف هو احنا مين ؟؟؟؟؟؟ وهنوصل لحد فين ؟؟؟؟؟؟؟؟

لا دي بلدنا .. ولا ده طبعنا .. ولا دي عاداتنا اللي احنا عليها متربيين وعليها طالعين !!!! بقينا تايهين .. محتارين .. متلغبطين .. متخبطين …… و والله قدام ولادنا بقينا مكسوفين !!!!.. وعليهم بقينا مش بس خايفين لا …. مرعوبين !!!!!.. ارحمنا برحمتك يا رحيم يا معين … احنا عليك انت وبس متوكلين ..

 

.. اللي اتسرق ده هيرجع !!!! ممكن .. ولا مستحيل ؟!!!؟ جوانا جروح كتير و وجع كبير ومستحملين وصابرين !! ..

 

بس خلاص فاض و طفح الكيل .. لا تربيه ولا قيم ولا تعليم …. و انتو بتتفرجو علينا و ساكتين !!!!!! علشان بلدنا وعشان الاجيال اللي جايين …. رجعولنا تاني القيم والمبادئ والاخلاق والدين .. ف المناهج و التعامل رجعونا مره تاني مؤدبين محترمين ..

 

خدو فلوسنا مش عايزين . خليلكو انتو الملايين .. اما احنا هنستحمل والله نبقي مفلسين .. ودي حاجه بقينا عليها متعودين … بس ادونا وطن نكون ليه عاشقين .. ادونا الامان ادونا الاحترام و الكيان و التقدير … خليكو علينا وع ولادنا حنينين و محوطين .. بلاش تضيعوهم !!! ده كفايه احنا ضايعين وبعيشتنا مش حاسين .. ولا لأي حاجه مش مستطعمين .. ولا فرحانين ولا مبسوطين ولا بالسعاده حاسين .. ولا عشنا يوم معاكو متهنيين …..

 

رجعولنا اللي اتسرق ولا انتو مش قادرين .. و لا تكونو مش عارفين ؟؟ .. خليكو مره حقانيين .. انتو فاهمين !!! انتو سامعين !!! .. ردو علينا !! ردو يا مسؤؤؤؤؤلين ؟؟؟

 

هتمشو صح ونقول معاكم .. بسم الله الرحمن الرحيم ..

ولا عاجبكو يبقي دعانا …….. حسبنا الله ونعم الوكيل ..

..