مسار الآثار: حوار الحضارة الباحث أحمد الأشقم
اداره الحوار ايمان عزت
انطلاقا من إيماننا بدور الإعلام فى نشر الوعى ودعم مبادرة الرئيس عبد الفتاح السيسي للحوار الوطني لكل الأطراف في كل المجالات التي تخص الوطن والمواطن، وتأكيدا لحرصه
على دعم وترسيخ الهوية الوطنية والإنتماء، و تفعيلا ل دور المجتمع المدنى كضلع مساند للدولة في تحقيق التنمية المستدامة، وتنفيذا لتوصياته بدعم وتمكين الشباب
أقمنا هذا الحوار مع الباحث الشاب احمد الأشقم عن مبادرته التوعوية الثقافية عن الحضارة المصرية
استاذ احمد تعريف بسيط بنفسك؟
احمد السيد الأشقم مؤسس فريق مسار الآثار لنشر الوعي الأثري باحث في التاريخ والحضارة الإسلامية
ايه مجال دراستك؟
انا خريج كلية اللغه العربيه شعبه التاريخ والحضارة قسم الحضاره جامعه الازهر بالزقازيق
ايه مبادرتك؟
جاتلك الفكرة منين؟ وليه الاسم دا؟
فريق مسار الآثار
هو فريق لنشر الوعي الأثري وترويج وتنشيط السياحة الداخلية ومساعده طلاب وطالبات الجامعات في مجال التاريخ والآثار والإرشاد السياحي
كنت بنزل أماكن أثريه دايما بس كنت بنزل لوحدي أو مع حد من صحابي كنت بنزل دايما لأماكن اثريه كتير لقيت أن فيه اماكن كتير جدا جدا الناس متعرفش عنها حاجه حبيت اني اكون واحد من الناس اللي توصل قيمه وعظمه التاريخ والحضارة المصريه بمختلف الحضارات الموجوده ويكون ليا دور في إبراز قيمه وعظمه حضاره مصر علي مر التاريخ ف فكرت اني اكون فريق اساعد بيه الطلبه وكمان أعمل علي نشر الوعي الأثري والترويج للسياحه والاثار المصريه ويكون لينا دور واضح تجاه حضاره مصر العريقه
اما بالنسبه للأسم
مسار الآثار مش مجرد اسم لفريق أو اسم لمبادره وخلاص حتي تصميم اللوجوا الخاص بالفريق كان عن طريق دراسه وبحث لفتره قبل الإعلان عن اسم الفريق
فيما يخص اسم الفريق
كلمه مسار معروفه لدي الجميع بمعني الطريق والآثار اي الطريق الى الآثار
أما لوجوا الفريق
فيحتوي علي رمز الحضاره المصريه وهي الأهرامات وأبو الهول وطريق ممهد وأشجار النخيل وبعض الأبل (الجمال)
أما الأهرامات ف للدلاله علي عظمه مصر التاريخيه والسياحيه
وأما الطريق الممهد والأبل فهما للدلاله علي سير الفريق ورمز الأبل خاصه لأنها أكثر كائن يتحمل السفر لمسافات بعيدة وشاقه وهوا صاحب قوه تحمل عاليه
وأما أشجار النخيل فهي للدلاله علي السياحه الطبيعيه والريفية بمصر
رايك في شرح التاريخ للأطفال والشباب؟
الحقيقه ان أهم فئه عمريه اتمني اشتغل معاها الفتره الجايه هيا الاطفال لأن التعليم في الصغر كالنقش علي الحجر علشان كده اكيد تعليم الأطفال والشرح ليهم شئ عظيم جدا جدا لأننا بنربي جيل جديد علي معرفه عظمه تاريخ مصر
والشباب مهم جدا جدا إدراك أنهم يعيشوا في بلد صاحبه حضاره عظيمه وأن يدركوا قيمه هذه البلد
الوعي الآثرى وصل لحد فين عندنا؟
فيما يخص الوعي الأثري
الحقيقه ان الفتره اللي فاتت شهدت مجموعه من الشباب والفرق والمبادرات اللي فعلا حاولت بقدر الإمكان أنها توصل قيمه التراث المصري لكل الناس وكانت حريصه جدا جدا علي الإهتام بالتاريخ والحضارة المصريه علشان كده بتمني اهتمام من المسؤولين بفرق ومبادرات الوعي الأثري لأن حقيقي فيه دور كبير جدا بيقدم من خلالهم
صورتنا الحضارية زمان ودلوقت وصلت لايه؟
مصر صورتها الحضاريه واضحه منذ فجر التاريخ وحقيقي محتاجين نحافظ علي صوره مصر وإننا جميعا نحافظ عليها سواء مسؤولين أو متخصصين او حتي شباب وعامه الشعب علشان نقدر نرتقي بمصر ونقدر نحافظ عليها احنا محتاجين نقراء في تاريخ مصر كتير جدا احنا لما بيمر علينا ذكري تاريخيه بنحس بفخر فما بال حضرتك لما يبقي تاريخنا كله ذكريات عظيمه جدا فيها انتصارات وفيه جهاد وفيه صمود وفيها فرح وفيها حزن فيها كل حاجه حابين نعرف وندرك قد ايه كل شبر في بلدنا عظيم واننا فعلا لازم نحافظ عليها
رسالة تحب توجهها؟ ايه؟ ولمين؟
الحقيقه عندي رسالتين
الأولي للمسؤولين
والله العظيم عندنا شباب في مصر واعي اوي اوي خلوا الشباب ده في فكر حضراتكم اعتمدوا علي شباب مصر شويه في كل المجالات الإستثمار في الشباب مهم جدا جدا والله العظيم احنا عندنا شباب ينحت في الصخر لمجرد أنه بس ممكن يحس أنه ليه دور ومكانه في بلده وأنه ليه تقدير احنا بنعاني يوميا من الإسفاف اللي بنشوفه
لازم يكون فيه تقدير للناس اللي بتقدم محتوي هادف علشان منتفاجأش أن كل شباب مصر ساب التعليم والمحتوى الهادف وبداء يلجاء للإسفاف لمجرد أنه يحس أن الإسفاف ده هيلاقي من وراه مجد وشهره ومال
ياريت نخلي ولو جزء من المجد والشهره والمال ده للشباب الواعي المتعلم
رسالتي للشباب مهما ضاق بك الأمر اعلم أن فرج ربنا قريب وخليك متمسك بحلمك وهدفك وأسعي دايما وخلي عندك ثقه في نفسك وفي هدفك
الخطوة القادمة في المبادرة؟
خطوه الفريق القادمه هي أن مسار الآثار في قري ونجوع مصر وفي المدارس والمراحل التعليميه المختلفه من أجل نشر الوعي الأثري ومحو أميه التراث المصري
