الرئيسية
شوفت ابويا في المنام
شوفت ابويا في المنام
شوفت ابويا في المنام …
بقلم أنتصار حسين
شاور وبعتلي سلام
قالي ياابني اتأخرت ليه؟
مستخسر زيارة فية ليه ؟؟؟
كنت بستناك من زمان
عدى الزمان.. ومجيتش ليه؟
..
قلتله ..في الدنيا عايش
داير فيها مفحوت يا ابويا
طاحنة عضمي …والإسم عايش
بجري زي الوحوش.. في البراري
ضهري مكسور… ولا قادر أداري
حتى جاري ….مبقاش جاري
كله متخفي… ورا حيطة بيبانه
كله خايف …على أحواله
عمال يداري ..على ايه يا جاري
…
شوفت يا ابويا ..إزاي بقينا
بقينا ناس تانية غير أهالينا
كُنا صحبة والكل واحد
اتفككنا فجأة منغير ما ندرىَ
والكل فجأة بقى حد تاني
قالي.. يعني يا ابني ..كدة راح زماني….
قلت هاعمل ايه يا ابويا
الحال اتقلب ..
حتى اخويا معادش اخويا…
وكل جميل راح يا ابويا
.
قاللي يابني الله يعينك
ع الحياة واللي فيها
بس كنت عايز اقولك
خليك فاكر انك .حتة مني
واوعى الحياة تنسيك زماني
لما كان يغطيك حناني
..
فاكر لما كنت تنام بغنوة
واشقىَ ليلاتي واقول عيالي
إبقى يا ابني كل فترة
تعالى قبري وخد منه عبرة
هي لحظة كتير عليا
بس أحِسَّك قدام عينية
ولما تمشي من عند قبري
خليك فاكرني وادعيلي يا ابني
وعيش حياتك بكل حكمة
قبل مماتك ماييجي بكرة
إعمل خير… خليه ببالك
وللغير …متقفلش بابك
خلي قلبك بيبانه مفتوحة
بكل ود وبكل نصوحة
تنهي حياتك وربك راضي
وتعبك يا ابني ميروحش ع الفاضي
واعمل الصالح تملي
زكِّي يابني
صوم وصلي
جبل حسناتك ..يعلى دُغري
خلي ذكر الله تملي… فوق لسانك
إدعي يابني في كل لحظة
مش عشاني …. لأ عشانك
ده الدعا هيعلي شانك
واوعى ايدك تلمس حرام
ولا جيبك يدخله الحرام
بالحرام يابني …بتضيق القبور
…
قلتله ..ويش حاله قبرك؟
قاللي يابني كله نور
قد ايه ربك رحيم
قد ايه ربك غفور
كنت رايح له وشايل
فوق كتافي ألف ذنب
بس كان جوايا نور
واسمه قلب
مايعرفش الا حب
ربنا رحمته أوسع
مما يتصور خيالك
ابتسمت من ضي وشه
وقولتله دي مكتوبالك
زدني يابا م النصيحة
قاللي هاقولها لك صريحة
اوعي يابني في مرة
تظلم
أو تكون إيد لظالم
وانصف المظلوم تملي
خلي روحك بيت للمظالم
خلي يابني بالك من امك
غيرها أبدا.. مايشلش همك
ده برضاها تِعلى يابني
ومهما تعلي ولا تبني
خلي بالك من ولادك
هما دول مالك حلالك
هما عنوان امتدادك
قلتله..تعبت يابا
ونفسي اجيلك
قالي.. كل شئ يابني بأوان
كل واحد له معاده
كل واحد وله نهايته
قمت بوسته من جبينه
ولمسته وبكل شوق بصيت في عينه..
وصحيت م نومي بفرحة
شفت ابويا في المنام
من جمال ..الحلم نفسي
ما اقوم …وكل ما اصحى
أرجع أنام
…
شوفت ابويا
بقلمي
انتصار محمد حسين
إقرأ ايضا
- نماذج قصصية رائدة للكاتب يوسف إدريس بثقافة الدقهلية
- محافظ القليوبية يتفقد طريق خط 12 و أعمال تطوير كوبري عرابي وأعمال النظافة بشوارع مدينة شبرا الخيمة
- رؤيه جديده تليق بالجمهورية الجديدة.. ضخ دماء شابة بحزب حماة الوطن بالإسكندرية
- محافظ المنوفية ورئيس شركة المياه يضعان حجر أساس إنشاء المبني الإداري الجديد للشركة
- محافظ الشرقية يُتابع أداء ملف تقنين أراضي أملاك الدولة
ونقدم لكم من خلال موقع (الراي العام المصري)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، كأس مصر , دوري القسم الثاني , دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
