الاستاذه/ شيماء ابو المجد مدرسة مادة الكيمياء للمرحلة الثانوية في حوار للرأي العام المصري كل مايخص طلبة المرحلة الثانوية
الاستاذه/ شيماء ابو المجد مدرسة مادة الكيمياء للمرحلة الثانوية في حوار للرأي العام المصري كل مايخص طلبة المرحلة الثانوية
حوار: مريم وليد
نبذة تعريفية بحضرتك ؟
شيماء ابو المجد مدرسة مادة
– ” chemistry ”
للثانوية العامة بالإسكندرية
– بكالوريوس العلوم 2007 بتقدير جيد جدا
– دبلومة التربوي 2014 بتقدير امتياز
– اشتغلت في مدرسة طيبة ومدرسة النجم الساطع ،
بعد كداقررت اني اتفرغ اكتر لشغل السناتر
– بدأت شغل في 2007 اسيسنت لمستر مصطفي العلايلي من أكبر مدرسين الكيمستري بالإسكندرية واتعلمت منه كتير بعد كدا بدأت استقل بنفسي برايفت في مجموعات صغيرة وكانت الانطلاقة من بداية النظام الجديد ” لاعتماده على الفهم اكتر من الحفظ ” ودا كان سبب حبي للكيمستري لأنها بالنسبالي فهم اكتر ولو متفهمتش مش هتعرف تشتغل فيها .
سبب اختيارك لمهنة التدريس ؟
وانا في ثانوية عامة كنت طالبه عند مستر مصطفى العلايلي وأول ما دخلت علوم قالي لازم تشتغلي معايا اسيسنت فأنا عندي شغف بالتدريس من وانا في ثانوية عامة وهو كان بيأهلني ، فضل كبير من اللي انا فيه يرجع لربنا ثم ليه .
ايه رايك في نظام ال open book والتعليم عن بُعد ؟
كنظام شرح بالنسبالي كمدرس مادة علمية انا محتاجه اختبر عند الطالب انت فهمت ايه مش حفظت ايه فكان النظام القديم بالنسبالي مش مبين القدرات لاننا كنا بنتوقع الأسئلة وكانت بتيجي بالأرقام فكان سقف التوقعات محدود ،
في سنة الكورونا ف شهر 3 خلاص مكنش فيه شغل ف كان لازم ندور على البدايل وبدأت مع الطلبة زوم ميتنج ومن هنا جتلي فكرة اني اعمل لايف للطلبة الصبح قبل ما يدخلوا الامتحان بيكون هدفه اني اطمنهم واقولهم القواعد اللي هيمشوا بيها في الامتحان فكان مطمئن اوي للطلبة ومشينا ع السيستم دا من ساعتها لحد السنة اللي فاتت وصداه بيكون كويس اوي كل سنة بيجي منه حاجات كتير اه مش الاسئلة بالظبط لان دا نهاه النظام الجديد بس الفكرة بتكون موجودة اول ما بيدخلوا بيعرفو يطبقوا عليها فالحمد لله كل سنة التوقعات بتصيب .
شغل الاونلاين ؟
احنا شغالين في منصة ” Super online academy ” ودي طبعا من أكبر وانجح المنصات في اسكندرية و فيه ناس في محافظات تانيه بدأت تطلب انها تشتغل اونلاين معانا ، ناس بقي فارق معاهم المادة العلمية نفسها مش فارق معاهم اني اشوف الميس بل اني اكون متشبع بالمادة العلمية نفسها .
علاقتك بالطلبة؟
هما مديييني لقب خالتوا من السنه اللي فاتت فطبعا الولاد في السن دا تحديدا الولاد ، البنات سهل السيطرة عليهم . من خلال دراستي في التربوي وبعد كدا تعمقت في دراسة علم نفس المراهقين عشان اعرف اتعامل معاهم ، انا مش قريبة منهم اوي في السن بس قادرة اني اكون قريبة ليهم بعملهم رحلات واللي هيجيب درجة كويسة هيتكافئ .
طبعا في انفراد احنا عاملينه السنادي محدش عمله على مستوى الجمهورية وهو اني جيبالهم أخصائية النفسية د / ” نجلاء مغازي ” ادمن جروب ” society problems ” هي صديقه ليا وعرضت عليها الموضوع ورحبت بيه جدا بتجلهم كل أسبوع تسمع مشاكلهم وهما بيبعتوا مشاكلهم ع البيدج طبعا في سرية تامه
وهي بترد عليهم بفيديوز على البيدج وهي لا تفصح عن هوية الطالب أو هو في سنة كام فكان دا مهم جدا بالنسبة للطلبة ، طبعا هي اغلب مشاكلهم في الفترة دي بتبقي مع الاهل بيكونوا مش متقبلين فكرة ان الطالب وارد يقع ف اسئلة كتير ووارد جدا يجيب درجة وحشة في الشامل ودا عادي لان المدرس مهمته يعوده على نمط الأسئلة بدل ما يتفاجئ بيه الطالب في الامتحان .
نظام المتابعة لحضرتك ؟
كويز كل أسبوع والبوكليت بتاع كل شابتر متقسم لتلات أجزاء جزء الشرح وجزء الواجب وجزء لحل اسئلة في الحصة لاننا بنشتغل حصتين في الأسبوع حصه شرح وحصة حل فحصة الحل بتكون مهمة جدا وبيكون فيها أفكار تقيلة انا عارفة ان الطالب هيعطل فيها
بعد بقي ما نتأكد انهم حلوا الواجب بنزلهم فيديو لحل الواجب على جروب الفيسبوك كدا يبقى هما اخدوا تلات حصص في الأسبوع حصه للشرح وحصتين للأسئلة فاانهم يشوفوا الميس بتحل ازاي دا بيثبت المعلومة وبيطمنهم انهم حلوا كم كويس في كل جزء فبيطلعوا من كل شابتر مُلمين بالمعلومات اللي انا شايفه انها كافيه تقوم طالب ثانوية عامة في التوقيت دا ،
برضو من ضمن الحاجات اللي احنا منفردين بيها احنا مش بنراجع مرة احنا بنراجع مرتين غير مرة ليالي الامتحان فهي الكيمستري ماده طبيعتها محتاجة تكرار فاحنا بنخلص المنهج من نص شهر تلاتة وبعد كدا من نص تلاته لأول خمسة بتكون المراجعة الأولى براجع فيها على كل شابتر بكل النوتس بتاعته وبحل عليه تاني من مصادر جديدة بتكون اتقل فبنعلي بالليفل بتاع الأسئلة لحد شهر خمسة بيكون كله حل امتحانات السنين السابقة
وامتحانات المعاصر وساعات بيجي منها في الامتحان فبيبقي لازم نحلهم من باب الاطمئنان ومن باب التدريب ازاي يحقق التارجت بتاعه في وقت قصير لان فيه طلبة بتاخد وقت كبير جدا في حل الامتحان ، فشهر خمسه بتكون أهم فترة في السنة غير بقي مراجعة ليالي الامتحان بكون معاهم طول الوقت يعني لو مثلا ليالي الامتحان خمسة ف بنشتغل أربع أيام وبسبلهم يوم هما يذاكروا فيه وبفتحلهم لايف بالليل ولايف قبل الامتحان.
نصيحه لطلبة الثانوية العامة ؟
بنصحهم ان مفيش اي حاجه تعطلك أو تقلل شغفك لان درجاتك في الشامل مش مقياس انت لسه بتتعلم لحد ما تخلص المادة وتبدأ مراجعة انت بتتعلم ودي اول مرة تاخد فيها المعلومات دي ف المعلومات دي بالنسبالي جديدة ان انا اخدها اول مرة وامتحن عليها ف اجيب درجه وحشة فازعل بقي على الدرجة ، ازعل عليها يوم واحد وبعد كدا اشوف اللي ورايا لان فيه مواد لسه علينا ولو انت اونلاين في فديوز لسه متراكمه فكدا كدا دا علينا فاحنا هنزعل ونفقد الشغف دا هيضيع مننا وقت ع الفاضي ، فلأ متخليش حاجة توقفك حلمك يستحق التعب اتعب على قد ما تقدر لحد ما توصل للهدف اللي داخل ثانوية عامة اصلا عشانه طبعا كل اللي داخل علمي قدامه هدف سواء طب ولا هندسة رغم انا بالنسبالي مفيش كليات قمة وقاع احنا اللي بنعمل لنفسنا القمة ولو كل واحد فينا حقق اللي هو عايزه مكنش زمانه دلوقتي في المكانة اللي هو فيها ، العربي كمان شايفة ان الولاد هاملينه جدا رغم انه ” ٨٠ درجة ” فلازم ياخد حقه في المذاكرة واللغات عموما خصوصا انه بيكون امتحان مفتوح ملهوش منهج .
نصيحه لأولياء الأمور؟
أولياء الأمور بالنسبالي أهم من الطلبة بقولهم متضغطوش على الولاد يكفي الضغط النفسي اللي هما فيه خصوصا الدفعات الأخيرة دي لأنهم عدوا بالكورونا فعدوا سنين كتير مش متعودين على مود المذاكرة والضغط ، متعنفش ابنك لو جايب درجه وحشة لان الدرجة دي هتقومه بعدين ، يعني احنا الأول عندنا السنة اللي فاتت جايب ٦٠ من ٦٠ كان يوم ما نقول انه جاب درجه كويسة تبقى ٢٣ من ٣٠ ف درجة الشامل مش مقياس لا اتكلم معاه ، ” طب شوف فيديو حل الأسئلة شوف انت وقعت في ايه متزعلش نفسك فكرة ” ، انا شوفت طلبة كتير وقعت وقعة وحشة رغم انهم شاطرين اوي بسبب تعنيف الاهالي . ولادنا هما استثمارنا في الحياة فمنجيش على السنه الفاصلة بالنسبالهم ونضغطهم بالشكل دا هما عارفين انهم في مسئولية كبيرة ، خلينا نمشي بسياسة الثواب والعقاب ” لو جبت درجه وحشه انا مدايقة بس متأكده انك المرة الجاية هتجيب درجة كويسة عشان واثقة في ابني انه هيشرفني ” فالكلام دا بيبقى حافز للطالب وبيكون من جواه حاسس بالذنب اللي هو لا انا اهلي تعبوا معايا فالازم السنة دي اديهم حقهم لكن حته اني اعنفه أو اقارنه ، المقارنة برضو وحشة جدا كان فيه ولاد بيعيشوا مأساة بسبب ان حد من قرايبهم مثلا معاه في نفس السنة فخلينا مدركين ان مش كل الطلبة نفس الدماغ ومش نفس البيئة المحيطة سواء مادياً أو اجتماعياً غير الفروق الفردية بين الطلبة وبعضها فلازم اكون مدرك قدرات ابني من الأول يعني انا دخلته علمي فأنا عارف انه شاطر لقيته مثلا لعبي يبقى يلا بينا على أدبي ، أدبي مش وصمه برضو انا بشوف أولياء الأمور لا يعني ايه أدبي ، انا بنتي ميولها انها تكون مدرسة انجلش خلاص تدخل أدبي مع ان احنا بيتنا مفيش حد فيه ملبسش البالطو فهي ميولها كدا انا مش هقف ضد ميولها وعشان انا مدرسة كيمستري لازم بنتي تبقى زيي ولو انا دكتور ابني لازم يطلع زيي . فلأ سيبوا الولاد تاخد راحتها في اختيارها فانا ضد حته تعنيف الطالب أو اني اضغطه نفسياً هضغطه نفسياً مش هيذاكر لان هما في سن عند وفيه امهات بتكلمني بتعيط مش قادرين يسيطروا على الولاد فهما بيحبوكي انتِ وبيسمعوا كلامك فواحدة واحدة وبراحة معاه الطالب يبدأ يتحسن فالأم لما تشوف انه اتحسن تبدأ تمشي معايا على نفس اللاين تبدأ بقي لا انا كنت غلطانة في كذا ، برضو لو جاب درجة كويسة لازم نكافئهم فيبقي فيه توازن نفسي اني لما جبت درجة كويسة ماما كافئتني ولما جبت درجة وحشة ماما زعلت مني معنفتنيش دا هيفرق اوي مع الطلبة .
وأخيرا دعواتي لكل الطلبة ربنا يوفقهم جميعا
https://www.facebook.com/Excellencechemistry?mibextid=ZbWKwL
01096271097
01224568160
01114762369
اقرأ أيضًا:
طارق الشناوي: قائمة الأجور مفبركة والقوائم موجودة منذ زمن ولها منطق
شيرين عبدالوهاب تتقدم ببلاغ ضد شخص استولى على قنواتها وصفحاتها الرسمية
تحذير عاجل من الأرصاد: مرتفع جوي يضرب البلاد.. وأتربة ورمال مثارة على جميع الأنحاء
التجمع يناقش مقترح مشروع قانون الأحوال الشخصية الجديد ببني سويف
الصحة: تفعيل خدمة الإقلاع عن التدخين في 14 عيادة بمستشفيات أمانة الصحة النفسية
وزير الرياضة يهنىء منتخب مصر بالفوز بكأس إفريقيا للبومزا برواندا
منطقة الإسكندرية الأزهرية تعلن فتح باب التظلمات على نتيجة الدور الثاني للشهادة الثانوية الأزهرية
البنك الأهلي المصري يوقع اتفاقية مع مكتب أبو ظبي للصادرات لفتح خط ائتمان بقيمة 100 مليون دولار لتنمية الصادرات الإماراتية
نقدم لكم من خلال موقع (الرأى العام المصرى )، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
