ضياع النخوة والرهبه من الدماء
ضياع النخوة والرهبه من الدماء ..
كتب .. اشرف زيدان
عارفين امتى الحاجات دي كلها ضاعت…
مش من انهارده…
لا..عارف امتى …ده من الأم الي بتسيب ابنها يلعب جيمز ويقعد يقتل في شخصيات اللعبة بأسلحة افتراضية ..ايوة اللعب القتالية بتشيل رهبة مسك السلاح والقتل…ورؤية الدم حتى ولو كان غير حقيقي..
عارف امتى…ده من وقت ما نزل بلطجية توقف الناس والعربيات بحجة حفظ ال الأمن ايام نكسة يناير ومحاولة هدم الشرطة المصرية..بقى كل عيل صغير يمسك شومة ولا سكينة ويقولك بدافع عن الشارع وهو مشروع بلطجي صغير…
رهبة مسك السلاح راحت…
عارف امتى…ده لما يطلعلك قصة مسلسل ان البطل اتظلم وجه ياخد حقه بإيده وبينتقم من الي ظلموه بالسلاح الأبيض بردو …وطبعا المسلسل ينجح والأولاد يقلدوا الممثل نمبر وان في تسريحة شعره وطريقة كلامه ولبسه …خصوصا ان كل شوية بيوريهم ان المسلسلات دي جابتله العربيات الآخر موديل الي مفيش زيها في مصر إلا اعداد قليلة…
وطبعا الطفل والمراهق يترسخ في عقله ان دراعه هو الي يجيب حقه…
يعني لما يتخانق مع واحد صاحبة في الحارة المطوة موجودة تحميه…
عارف امتى لما سمحنا ان اغاني تنتشر ويتقال عليها مهرجانات وشعبي منحط ويترقص عليها بحركات لا عارفين مين الي اخترعها وزي ما يكون بيخرجوا عفاريت من اجسامهم وإيه بإستخدام الأسلحة البيضا بردو.الرقص بالسلاح..واعتبر فن لما اتسكت عليه من اوله…
ومفيش حد قال ده انحدار ولازم يقف من اوله…
عارف امتى لما بقى في تساهل في التربية وعدم المسئولية …
لما الحساب اتأخر …
لما بقى الصوت العالي والتلفظ بالشتائم والسوقية هي اسلوب التعامل..
ارحموا نفسكم واهلكم ومجتمعكم وبلدكم…
