عاش راجل .. بقلم ” أماني درويش “

من يوم ما ربك خلقها
وهي قلب جميل
ضحكتها سابقة كلامها
ماشية تقول مواويل
نجمة في عتمة ليل
ضيها شغل الحيارى
شمس النهار فجمالها
ست البنات العذارى
و ف يوم قابلت عنيه
فارس على حصانه
فرش النجوم سجادة
وخطفها بـ كلامه
وقلها خطي
يا ام العيون غزلان
الكتف دا زادك
والتاني ليكي أمان
قفلت عيونها وقالت
خلاص هنسى اللي راح
لقيت اللي قلبي عليه
يسند بقى و يرتاح
لاعمري هبقى لغيره
وضلوعه ليا براح
……………….
بكرة اكيد أحلى
فستان أبيض وطرحه
رقصت ف قاعة كبيرة
وفرحة عنيها تتشاف
حوليها سطر ملايكة
ومن السعادة أصناف
حطت راسها ونامت ..
مالت ندالة الكتاف !!
………………….
صحيت يا حبة عيني
على جلجلة وخناق
ومحكمة وقضايا
نفقة ورؤية وطلاق
وأب باع أولاده
بضاعة ف الأسواق
حارب أم بعيالها
وقال فاكرها شطارة
قتل الورود ف غصونها
من غير ندم يا خسارة
كأنهم حبة ورق
ولمهم ف شكارة
يتامى أبوهم حي
والدنيا غدارة
كتبوا ف بطاقته ذكر
ولا كل ذكر راجل
……………….
رماهم برة حياته
وقال خلاص يا سلام
اعيش حياتي أنا
واتهنا بالأيام
دفن الضمير جواه
ومات فيه الكلام
وناسي ان فوقه رب
لا يغفل ولا بينام
كتبوا ف بطاقته ذكر
ولا كل ذكر راجل
…………………
وغيره عاش هامش
مفعول ومش فاعل
تصرف عليه حرمته
راضي بلقب عاطل
وحِمل فوق حملها
وضرب وإهانة
وكل ليلة تبات
ف الحزن غرقانة
كتبوا ف بطاقته ذكر
ولا كل ذكر راجل
………………….
افتح كمان القوس
زود كمان خيبة
مفيش كلمة هنا
غير كلمة الشيبة
وأم عاملة ابنها
فـ إديها شُخشيخة
متحكمة فالهوى
باليوم والليلة
وان قال دا بيتي انا
تعمله هُـليلة
جيباله لعبة أصلها
طبعا مهو الحيلة
كتبوا فـبطاقته ذكر
ولا كل ذكر راجل
………………
يا كل أب اتوجع
على بنته وعشانها
عاشت فحضنه الدلع
روحه فدى عيونها
اختار لبنتك جدع
يحميها ويصونها
يعمل عشنها البدع
وعمره ما يخونها
كتبوا ف بطاقته اتولد
راجل و عاش راجل