كورونا الإنسان

كتبت/ ايه حسين أبوبكر

مع وقت ظهور فيروس كورونا ظهر حاله من الرعب والذهول لأول مره في التاريخ .العالم يتساوي ، طبقات العالم تتساوى وكلنا تحت نفس السقف منتظرين اكتشاف لقاح او علاج فعال وتستمر الاجتهادات ولكن حتي تتم المعجزه هتمشي علي البروتوكول وانت ومنعتك بقي ✋
كلنا عارفين منشتات كتير منها :
الوقاية خير من العلاج
وعارفين برضه ان لكل داء دواء
بس بننسي حاجه مهمه اووي ان في حاجه اسمها اختبار من ربنا مع كل موقف بتمر بيه في حياتك.
هو ممكن المره دي اختبار جماعي شويه وخطر هدد وبيهدد العالم كله اللي هو المفروض تقف وتعيد حساباتك كافرد لكن المشهد للاسف تحول مع بعض الناس لكشف معادنهم والمرض اصبح المتعافي منه له قيمه وبلازما الدم بقي ليها مزاد
انت وفلوسك بقي ومش هنختلف كنا بنسمع ونشوف ابن بيتخلي عن امه وابوه عشان المسؤليه ودول ناس كبرت دار المسنين اولي بيهم ونسينا قول الله تعالي (وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا)

وشوفنا نهايات للظلم عشان نتعظ ولكن استمر البعض وكأن التخلي عاده !!!
تخلي الاهل عن دفن قريبهم تخلي اهل البلد عن جارهم اللي كان حبيبهم وعدم دفنه في مقابر البلد لانه من مصابي الكورونا ونسينا ان تكريم الإنسان دفنه وان أصبح المرض عار علي صاحبه !!
بس العار الحقيقي مش في سنه ٢٠٢٠ ولا في الفيروس. هو ف فكرك الأدمي أووي اللي نساك ان الدنيا دواره واننا مش كبار علي اي مرض
وعلي قد عملك ربنا هيكرمك وان هيجي وقت مش هينفعك غير عملك وقلبك ومعدنك الطيب وقد ايه راعيت ربنا في اللي عملته .
خليك رحيم بغيرك عشان ربنا سبحانه وتعالي يبقي رحيم بيك وبلاش تخلي الكورونا ليها فرع رئيسي وتبقي كورونا الإنسان