كيف يمكنني إتخاذ قرار صحيح
كيف يمكنني إتخاذ قرار صحيح ؟؟
بقلم أزهار عبد الكريم
أوقات كتير بتعدى علينا مشاكل فى حياتنا وبنكون مش قادرين نأخد قرار وبنكون محتارين بين اه أو لأ ..
كلنا عندنا قرارت فى حياتنا لو أنا طالب فى الثانوية العامة بكون محتار ادخل علمى ولا ادبي ،طيب أدخل أي كليه .
طيب لو عاوز اكمل واتعلم لغات جديدة أو اللعب رياضه أو حتى أفكر أني أنقص وزني ،
طيب لو أنا صاحب شركة وعندى مشاكل فى الشغل ، كمان لو أنا شاب أو شابة فى مرحلة الخطوبه ومش عارف أخد قرار أكمل خطوبه ولا لأ ..
فى ناس بتقول أنا مش عارف أخد قرار دة فى حد ذاته قرار أنك قرارت متخدش قرار فى مشكلتك وتشوف غيرك هو اللى يقرر بدالك . أنت كده بقيت شخص ضعيف وتابع لغيرك فلازم تتعلم ازاي تقدر تأخد قرار صحيح فى حياتك . أنك تبدأ شوية شوية تنمي عندك جزئية إتخاذ القرار.
طيب إزاي اقدر أعمل الحاجة واستمر عليها وأنا كل ما أبدا حاجة مكملهاش للآخر ؟
خد بالك انك كده أخدت قرار ضعيف علشان مقدرتش تستمر ،لكن القرار القوى هو أنك تأخد قرار أنك تستمر وتكمل وتقطع كل الاحتمالات اللى ممكن تخليك ترجع تاني عن قرارك فى الحالة دى أنت بتقول لنفسك أنا قرارت وأنا عارف أن القرار ده تحديد مصيرى مش ناتج عن حالتي النفسية ….
بمعنى لو فى أمرين وأنا عاوز أخد قرار مصيري بينهم ومش قادر أخد قرار لأن مشاعري مياله لجانب منهم لكن العقل رافض هذا القرار ،هنا بيختل ميزان القوة الداخلي بين العقل والعاطفة وتبدأ المشاعر والأحاسيس تأثر على العقل ومتقدرش تفكر كويس .
أعرف أنك فى الحالة دى هتأخد قرار خطأ ومش صحيح لأنه قرار عاطفى بيتوقف على الحالة النفسية لو أنت مبسوط أو زعلان ….
وطالما إنك بدأت تأخذ قرار يبقي لازم تتعلم تأخد قرار صح مبنى على مفهومك الذاتي مبني على قيمك واخلاقك ومعتقداتك مبني على كونك بتفكر إزاي ،مبني على إدراكك اللإشياء ، مبني على برمجتك الذاتية ،ايضاً المؤثرات الخارجية كل دول مع بعض هيخليك تقرر تتصرف ازاي وعقلك هيأخد القرار الصحيح .. وقتها ده هيكون قرار قاطع بمعنى أن مفيش حاجة فى الدنيا هتوقفك مهما كانت التحديات، مهما كانت المؤثرات الداخلية أوالخارجية ، مهما كان رأي الناس أو أستهزاهم مني ، مهما كان الخوف من الفشل ،مهما حصل حط فى دماغك أنك هتوصل بإذن الله هو دة القرار أنك لما تقرر محدش يقدر يغيرلك رأيك …..
خدو بالكم أن التحدي موجود فى حياتنا مش علشان يتعبنا لأ دة هو موجود علشان يعلمنا الجديد علشان يكون عندك قوة ذاتية اكتر من اللى أنت فيها النهاردة …..
طيب لو جهتني مشكلة معينة اتصرف ازاي؟ وايه هو السبب اللى بيخلي الناس ترجع فى قرارها ؟؟
أولأ البرمجة الذاتية من التجارب الشخصية فى الماضى والخوف من تكررها مرة تانية ،والخوف من الفشل ،والخوف من المجهول ، كلام الناس وأراءهم اللى بيسمعها منهم …..
كل دول مؤثرات داخلية وخارجية بتأثر فيك وفى قرارك .بعض الناس لما بيكون فى مشكلة ويحاول يحلها مرة واتنين وثلاثه ويفشل هو خلاص كده بيتوقف عن المحاولة بعد كده لأنه برمج نفسه أنه مش هيقدر يحلها ويقف بعد كده عن محاولة تحقيق أحلامه …
مفروض لما توجهني مشكلة زي دى ابدأ أفكر خارج الصندوق وأبتكر حلول جديدة للمشكلة اللى بتوجهني وأضع أسس صحيحة .
أول حاجة هى الأدراك .أنك تعرف أن فى عندك مشكلة . وتبدأ يكون عندك إرادة لتحقيق هدفك وحلمك و تحس بيه وتتفاعل معاه وتديلوا أسباب ورغبه فى الوصول إليه وتبدأ تتخيل وتشوف نفسك فى خيالك وأنت بتحققه وبتحل كل المشاكل اللى بتوجهك وهو ده الغرض من التخيل الابتكارى .
تاني حاجة هى الإختيار ،أني أدخل التحدي وادور على حل للمشكلة . لازم يكون عندك حافز يخليك تقبل التحدي أولاً التوكل على الله والاعتقاد الذاتي اني هنجح ، أفتكر الألم و اليأس والخذلان من الآخرين ده هيخليك تتحرك وتتعلم من تجاربك السابقة .
الأمل والايحاء أنك عندك هدف وفكرة وحلم ومش قادر تنتظر اكتر من كده علشان تحققه .
ثالث حاجة إني أكون مسؤل عن التحدي واخد قرار واعي ومدروس . وابدأ فى التنفيذ .
آخر حاجة هى التخطيط الصحيح وفى الحالة دى مفروض أستعين بالمتخصصين فى المجال دة علشان اقدر أحقق هدفى اللى أنا عاوز أوصلوا وهو ده الفرق بين الشخص الفاشل والشخص الناجح فى الحياة ….
دمتم بألف خير وسعادة
تحياتي لكم جميعاً
أزهار عبد الكريم
