لازم نفكر ولازم نفهم

بقلم حسان ابوجازية

بعد نشر مقالتي السابقة ماذا بعد الرحيل ايها الخونة والمأجورين وما لاقت من نجاح غير متوقع وزيادة انتشار والتي تقاس بنسبة النقد وأكثر منها التأييد كان لابد من كتابة مقالتي هذة بعنوان ( لازم نفكر ولازم نفهم )

فالاحداث السريعة الي تمت في الأيام القليلة الماضية كانت لنا كـ مصريين بمثابة ضوء احمر كشف لنا حاجات كتير وصحتنا من نوم عميق كنا مش هـنصحي منه تاني ..

حقيقي كانت حاجه تافهة وكام عيل فاشل خائن وماجور و ماشي ورأئهم حفنة من الاوباش وشرزمة وكلهم ميطلعوش ٥٠٠ شخص من 100 مليون , لكن كشفت لنا حاجات كتير

١- كشفت لنا ان هناك أفراد من الشعب مغيبة في الفكر واصابهم العمي وليس لديهم بصيرة في الرؤية الكافية التي تجعلهم أن يكون عندهم رؤية في النقد او الحيادية ..

٢- كشفت لنا ان اختيارنا اننا نكمل في طريقنا وعدم تراجعنا كان صح وعكس البعض اللي قرر ميتكلمش في السياسة علشان ميزعلش حبايبه او صحابه اللي ضد توجهه ..

٣- كشفت لنا ان الممولين لسه مزهقوس وكلنا قولنا أن التمويلات وقفت ، ولكن هي فعلا وقفت لناس كانت كروت وأتحرقت ، لكن اتحولت لوجوه جديدة بيتلعب بيها دلوقتي منها كلاب عرفناهم ومنها لم يكشف عن نفسه بعد ..

٤- كشفت لنا ان اعدائنا بيزيدو مش بيقلو وكل ما هنتقدم خطوة في أي مجال هـ يظهر لنا اعداء من مصلحتهم ان مصر تتراجع ومتكملش ..

يوجد هناك سؤال هنا
حد يقدر يقولي كان ايه طلبات المتظاهرين , كانو عايزين السيسي يرحل ليه
عندهم نقص في سلع معينة ؟ . لأ ..

طيب فيه ازمة كهرباء ولا بنزين ولا انابيب مثلاً ؟ . محصلش واتحدي اللي يقول كدا .

شالو الدعم عن التموين ؟ . حاشا لله ..

طيب عندهم ازمة اسكان ؟ . لأ طبعاً

طيب ممكن اللي نزلو هما سكان العشوائيات والمناطق الخطرة ؟ . للاسف الناس دي بقت في مكان احسن مني ومنك

اذن ماهو السبب وفية أية ايها الكلاب التي تنبح

هو مطالبهم ؟ . فقط مش عايزين السيسي ولا الجيش

طيب اشمعني الجيش المرة دي

الرد في السطور القادمة
ونرجع لمرجوعنا

?اللي حصل بالنسبة للمتأمرين جس نبض بس ..
كان اختبار للثقه بين الشعب وجيشه .. بين الشعب ورئيسه
يعني هيشوفو هل الناس عندها قابلية تصدقهم تاني ويمشو وراهم ولا لأ ..
يعني بالبلدي كدا الشعب مصدق الرئيس ومتمسك بجيشة ولا لا ..

? وطبعا لازم اوضح شئ مهم جداً:
في كل مرة ومن ٢٠١١ لحد النهاردة كان هدفهم الاساسي اسقاط الدولة لكن كان بـيوهمک انه عايز يسقط رئيس أو نظام او جهاز امني ، لأنک لو اخدت بالک ان النشطاء وباقي مجموعة الاوباش المتامرين كانوا ضد مبارک ، وبعدها اختارو مرسي ، وبعد كدا هاجموه ، ولو جه ملاک من السماء كانو هـيبقو ضده لان هدفهم مش الاستقرار ابداً والهدف الرئيسي هو اسقاط الدولة المصرية ، لكن في كل مرة كان العقبه امامهم هو الجيش ، علشان كدا المرة دي الهجمة شرسة علي الجيش
لان الجيش مش عقبة امام اسقاط الدولة بس ، لكن عقبة امام حاجات كتير وحصلت الايام القليلة الماضية ولازم نفهمها كويس:

١- طبعا كلنا عارفين ان مصر ودول عربية اخري رفضوا صفقة القرن ، واسرائيل تقدر تنفذها لان مفيش حاجه تعمل حسابها لكن العقبة امامها فقط هو جيش مصر ..

٢- موضوع اكتشافات الغاز المصرية عامل مهرجانات في دماغ اردوغان وعمال في السقف يمحر وفي الارض يفحر ومش عارف يعمل ايه , لانه كان بيحلم انه تركيا تبقى مركز الغاز الاقليمي وتمر من عنده انابيب الغاز القطري والاسرائيلي والبترول العراقي لاوربا والاستيلاء علي الموارد الليبية ويهيص ، لكن مصر فوقته من حلمه وبقت هي المركز الاقليمي ومقر منتدى غاز شرق المتوسط ، ومن ساعتها عمال يخطط وبينقب عن الغاز في قبرص ، وبيقول ان ترسيم الحدود بين مصر وقبرص باطل وعايز حصتها من حقل ظهر باعتبار تركيا تحكم جزء من قبرص واللي هو الجزء الشمالي اللي بـ تحتله تركيا منذ عام ١٩٧٤ , وأعلنت إنشاء جمهورية شمال قبرص التركية ولم تعترف أي دولة في العالم بها سوى الدولة التركية ، وطبعا تركيا دخلت المياه القبرصية عنوة وعايزة تسيطر علي حقل ظُهر المصري ولكن ايه العقبة اللي امامهاجيش مصر ..

٣- دا غير روسيا اللي هنحل محلها ونبقي حنفية الغاز لاوروبا بعد الاحتكار التركي اللي دام لـعقود وكان الغاز هو ورقة الضغط علي الاتحاد الاوربي اجمع ..

٤- طبعا كلنا شايفين الاحداث الجديدة ورفض الاثيوبيين لطلبات مصر بخصوص فترة ملئ سد النهضة ، بعد دعم اسرائيل لها بمنظومة صواريخ Spyder-MR المضاد للطائرات واحتمالية وجود حرب لان موضوع المياه مسألة حياه او موت لينا ..

٥- كلنا برضو شايفين تآمر امريكا علي الدول اللي ملهاش فيها قواعد ويتجبرها بالذوق والعافية بواسطة اذرعها في المنطقة (ايران واسرائيل وقطر) انها تقبل بوجود قواعد بها

مع العلم ان الطلب الامريكي ببناء قواعد في مصر كان ومازال قائم لكن مصر ترفض في كل مرة لان عندها جيش قادر يحميها ..

✍وبناء علي ماسبق لو حضرتک نظرت نظرة متمعنة هـ تعرف ان العقبة امام سرقة غاز مصر وصفقة القرن وتنفيذ الاجندة الامريكية والتركية والقطرية والاسرائيلية هو جيش مصر ..

فـ مش هـيوقفوا تآمر ومش هـ يبطلوا تمويلات ..

هل حضرتک قادر علي مواجهة دا كله و جيشک بدون ظهير شعبي او مُنهک في فوضي داخلية !

دا ٦ شهور في انشغال الجيش سنة ٢٠١٢ فقط كانت كفيلة ان اثيوبيا تبني سد كانت مش قادره تبنيه لمدة ٧٠ سنة
مابالک حضرتک بقي لو الجيش وقع خالص او انشغل سنتين او تلاتة ..

وفي الاتجاه الأخر احنا مش هـ ننام تاني ومش هـ نبطل نقول ونعيد ونفهم الناس اللي كلمة توديها وكلمه تجيبها
الحرب لسه مانتهتش ، والكلاب كل يوم بتتسعر اكتر وهما عددهم لايذكر لكن صوتهم عالي وبيشتغلوا بـ مقابل
لكن احنا لله وللوطن وان شاء الله ربنا يجازينا عنه كل خير.

شكرا لكل انسان وطني مخلص ساند وطنه وجيشة ورئيسة وعرفنا الفرق بينه وبين ما يطلقون علي أنفسهم وطنين ولكن في الحقيقة أنهم ناقمين حاقدين
تحيا مصر. تحيا مصر
تحيا مصر