الاستاذ هشام خالد مدرس مادة الاحياء للثانوية العامة  في حوار خاص للرأي العام المصري وكل مايخص طلاب المرحلة الثانوية

الاستاذ هشام خالد مدرس مادة الاحياء للثانوية العامة في حوار خاص للرأي العام المصري وكل مايخص طلاب المرحلة الثانوية

حوار: مريم وليد

علم الأحياء : هو علم طبيعي يُعنى بدراسة الحياة والكائنات الحية، بما في ذلك هياكلها ووظائفها ونموها وتطورها وتوزيعها وتصنيفها فكان للرأي العام هذا الحوار

 اولا : نبذة تعريفية بحضرتك ؟

هشام خالد مدرس احياء للثانوية العامة عندي ٢٩ سنة، اتخرجت من كلية التربية قسم العلوم البيولوجية و الجيولوجية سنة ٢٠١٧، بدأت في مهنة التدريس سنة ٢٠٢٠ بعد الانتهاء من فترة التجنيد.

***سبب اختيارك لمهنة التدريس ؟

اختياري لمهنة التدريس سببه في الاساس حبي لعلم الأحياء ، في فترة الثانوية العامة كنت بحب مادة الاحياء جدا و بذاكرها كتير جدا اكتر من اي مادة تانية و بستمتع بشرحها لأي شخص سواء من الاهل او الصحاب، بعد ما خلصت تالتة ثانوي كان قدامي كليات علمية زي تمريض و غيرها لكني قررت اني بحب علم الاحياء فأنا عايز اكمل في دراسة علم الاحياء و حبذا لو هدرس العلم اللي انا حبيته طول عمري فقررت اني ادخل كلية تربية قسم أحياء و طلعت مدرس احياء.

**هل تستخدم منصة إلكترونية في الشرح وهل تري ان نظام الاونلاين افضل أم لا؟

طبعا بعد فترة الكورونا انتشر التدريس الاونلاين و انا بالفعل بستعين بالمنصات الاونلاين في شغلي و لكني شايفها مكمل للعملية التعليمية الاساسية على ارض الواقع مش بديل بيها، يمعني انا بستخدم المنصات لحل اسئلة او للمراجعات او لمناقشة بعض الافكار الهامة للتأكيد عليها او لعمل حصص كاملة جاهزة تفيد الطلاب المتغيبين عن الحصص لأي ظرف، لكن اعتقد ان وجود الطالب امام المدرس في قاعة التدريس شئ مهم جدا للتواصل بينهم و عملية التواصل بالعين مع الطالب بتأكدلي ان المعلومة وضحت تمام ولا يا ترى محتاج اوضح اكتر بمثال اخر و هكذا، اعتقد ان الاونلاين مهم جدا عشان نكمل العملية التعليمية مش كبديل عن الحصص الاصلية في الفصل، لذلك اعتقد ان نظام الاونلاين مش افضل من التعليم العادي و لكن التعليم بالاستعانة بنظام الاونلاين هو الافضل للطالب و ليا كمدرس .

**ما رأيك في إعادة هيكلة الثانوية العامة وتقليص عدد المواد الدراسية ؟

اعادة هيكلة الثانوية العامة امر غير واضح حتى الآن اعتقد الخطة لم يتم الاعلان عنها بشكل كامل لسة، و خصوصا ان التصريح بهذا التغيير جاء متأخرا جدا بشكل صادم و غير مفهوم ؟!

*** بغض النظر عن الطريقة اللي تم بيها هذا القرار لو حبينا نقارن بين عدد و حجم المواد قبل كدة و دلوقتي؟

اعتقد ان تدريس لغة تانية على الطلاب كمادة اساسية كان شئ جيد جدا كتأسيس للطالب على هذه اللغات لكن خروجها برة المجموع كلنا عارفين ان المادة هيتم اهمالها بالنسبة لشريحة كبيرة جدا من الطلاب و بالتالي فقدهم لهذه الاساسيات

الغاء العلوم الانسانية من الصف الثالث الثانوي برضو اعتقد انه مش صح خالص بل اعتقد ان مادة زي علم النفس كان المفروض يتم تطبيقها على الشعبتين العلمي و الأدبي زي ما كان بيحصل زمان و كان طالب العلمي يقدر يختار مادة أدبية يدرسها زي علم النفس او الجغرافيا او غيرها..

كان طالب العلمي بينم تثقيفه في الجانب الادبي، لكن الغاء العلوم الانسانية من مرحلة مهمة زي تالتة ثانوي هيخرج اجيال لم يتم اعدادها نفسيا و عقليا بشكل صحيح، مواد زي علم النفس و الفلسفة هي مواد اساسية لبناء انسان سوي و عاقل و قادر على حل المشكلات ، للأسف تهميشها في رأيي مش صح نهائي .

**هل ترى أن مادة العلوم المتكاملة ستفي كدراسة الكيمياء والفيزياء والأحياء كمواد مستقلة؟

بداية المرحلة الثانوية هي بداية التخصص في التعلم للطالب، خلاص الطالب خلص مرحلة التعليم الاساسي و يعتبر حصل على كل الاساسيات العلمية و الادبية اللي تأهله يتخصص في شعبة معينة، فكان لازم يتم عرض المواد عليه بشكل مستقل عشان يقدر يشوف مواد العلمي بشكل واضح و منفصل عشان يكون رأي كامل و صحيح عن المواد بمعني يتعرف علي مادة الاحياء بتتكلم عن ايه و يدرس موضوعات هذا العلم بشكل منفصل عن علم زي الكيمياء اللي هيدرسه لوحده برضو منفصل عن الفيزياء و بكدة يقدر يقرر انا عايز اكمل في دراسة المواد دي و اتخصص فيها ولا يا ترى حبيت المواد الأدبية اكتر زي الفلسفة و التاريخ و الجغرافيا و هكمل في دراستها.

دمج العلوم التلاتة في مادة واحدة هي العلوم المتكاملة هيخلي الطالب عنده معلومات كويسة عن موضوع محدد اللي بيتم مناقشته ف المنهج

يعني مثلا الطالب بيدرس في العلوم المتكاملة النظم البيئية كمثال على التكامل بين التلات علوم، فهيكون الطالب عنده معلومات كويسة جدا عن النظم البيئية بالكيمياء اللي فيها بالقوانين الفيزيائية بالاضافة للكائنات الحية و تكيفها في هذه النظم البيئية.

لكن هنا الطالب لم يتم تأسيسه في علم الكيمياء، لم يتم تأسيسه في علم الفيزياء ولا الأحياء.

يعني الطالب لم يدرس تركيب الخلية مثلا بشكل مفصل يخليه عارف ايه هي الخلية و ايه وظيفة كل عضي في عضيات الخلية.

لم يدرس الكميات الفيزيائية و طرق القياس و الوحدات القياسية و اساسيات مهمة جدا لعلم الفيزياء.

لم يدرس اساسيات كتير جدا في علم الكيمياء تأهله يفهم تفاصيل العلم دة في الصف الثاني و الثالث الثانوي.

و حتى لو تم اضافة هذه الاساسيات في منهج تانية و تالتة لانها مهمة، طيب ما كان بيدرسها في اولى يبقى ليه شيلناها و حطينا هذه المادة اصلا.

***لماذا التحميل على الطالب بهذا الشكل؟

اعتقد ان مادة العلوم المتكاملة مش هتكون وافية لتأسيس الطالب زي ما كان هيحصل لو درس كيمياء و فيزياء و احياء.

 ***نصيحة لطلبة الثانوية العامة ولطلاب الشعبة العلمية بشكل خاص ؟

نصيحتي لطلاب الثانوية العامة عدم الالتفات للاشاعات و غيرها من اسباب التشتت، خليك مركز في هدفك و كمل.

و خليك عارف ان مهما حصل من احداث ممكن تأثر عليك و على تركيزك بشكل او بآخر هيكون في ناس بتستعين بالله و قافلة على نفسها و مش فارق معاها كل دة و مكملين و مركزين و بيعملوا اللي عليهم وهم دول اللي هيحققوا حلمهم في الآخر.

خليك قريب من ربنا، صلي لو مبتصليش، لو بتقطع حاول تلتزم اكتر، لو ملتزم ادعي ربنا يثبتك و يزيدك من فضله.. اوعى تنسى ان كل اللي بتعمله و بتسعاله هو في الآخر بيد الله، ادعيه و هو هيوفقك للي فيه الخير ليك، اوعى تيأس من كرم ربنا.

اسعى انك تتعلم، مش بس انك تنجح و تعدي، خلي عندك حافز انك تبقى شخص مثقف واعي متعلم مش بس انجح السنه  و خلاص، و اخر نصيحة لتالتة ثانوي اوعى تراكم اوعى تراكم اوعى تراكم.

بالنسبة لطلاب الشعبة العلمية عايز اقولهم انتوا قدها، مهما حسيت ان في كمية معلومات كتير و في مسائل بقع فيها كتير اوعى تيأس، اوعى لما تتعب تقول مش هحاول تاني.

اللي غلطت فيه ٥٠ مرة و برضو مش فاهمه ، ممكن لما تحاول المرة ال ٥١ تكون هي اللي ربنا كاتبلك فيها الفهم و التوفيق ، لو كسلت مكنتش هتفهمها عمرك و ممكن كنت تغلط فيها ف الامتحان و تكون سبب في ضياع حلمك، حاول تاني لحد ما توصل للطريقة، و ربنا يرزقنا و يرزقكم الفهم .

حبايبي طلاب علمي علوم اقابلكم في باب ال DNA و احكيلكم قصة الصورة ٥١، بعد ٥٠ محاولة فاشلة .. المحاولة رقم ٥١ كانت هي السبب في تخليد اسم عالمة مهمة جدا في تاريخ البشرية، اوعى تيأس، كمل و حاول تاني و اكيد ان شاء الله هتوصل للحل.

**في رأيك ما هي اهمية دور المعلم في الوقت الحالي ؟

المعلم هو الاساس، كتير مننا بيغفلوا عن دور المعلم

مهما كان الوضع صعب ومهما كان من احباط و انكسار و أزمات، المعلم هو الأمل.

المعلم دوره انه يشاور لطلابه على النور اللي ف آخر الطريق المظلم و ياخدهم من اديهم يوصلهم، وليس الاحباط حتى لو هو محبط، ميفضلش ينقلهم طاقة سلبية”المعلم هو الأثر”.

حاول تبقى معلم ذو أثر جيد في نفس طلابك، ميكونش اثرك فيهم هو الاحباط و فقدان الشغف.

وسط كل التخبطات خليك واثق و واقف على رجلك وعلم طلابك ان مهما كان الوضع صعب، لا بد من ايجاد حل ، وقت ضيق، تضييق من كل اتجاه، مش مهم.

انا كمعلم هقدر اتخطى كل دة عشان اجي اقف قدامك ف الحصة بضحك و كلي طاقة عشان اعلمك حاجة تنفعك في حياتك. انت قررت تبقى معلم، يبقى لازم تتحمل مسئولية انك تبقى معلم ،مسئولية كبيرة و لكن ما اعظم تحملها.

**نصيحة لأولياء الأمور؟

بقول لأولياء الأمور، ربنا يقويكم و يقوينا، اه الوضع صعب جدا.. بس دي مسئوليتنا اللي ربنا كلفنا بيها و اكيد هيعينا عليها.

نهتم بأولادنا.. الدنيا بقت صعبة جدا، لازم نتكلم معاهم و نفهم دماغهم و تفكيرهم، لازم نوعيهم و نحاوط عليهم.

نخلي في وقت للهزار و للكلام، لازم نتكلم مع اولادنا و نبقى احنا مصدر الثقة و التأثير عليهم، و إلا هيتم التأثير عليهم و السيطرة على عقولهم من حاجات كتير جدا خطر عليهم نسأل الله العفو و العافية

Facebook group:
https://m.facebook.com/groups/631344719103088

Facebook acc:
https://m.facebook.com/hesham.mohamed.20

Facebook page:
https://m.facebook.com/geneticbiology

YouTube channel:
https://youtube.com/@hishamkhaledbio

WhatsApp: 01201610878

نقدم لكم من خلال موقع (الرأى العام المصرى )، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية