مشاعر في ساندوتش جبنه

مشاعر في ساندوتش جبنه

✍ / حنان حامد

عارف لما تبقي جعان وعايز تاكل ، بس مش قادر تستني لحد ما الاكل يجهز فتلاقي قدامك ساندوتش جبنه وانت اصلا مبتحبش الجبنه بس تقرر انك تاكله عشان يسد جوعك لحد ما الاكل اللي نفسك فيه يجهز
في ناس بتتعامل مع غيرها علي انه ساندوتش جبنه
ناس بيكون عندهم فراغ عاطفي ، او خارجين من تجربه فاشله، أو عندهم مشكله شخصيه او عائليه . او نفسهم يحبوا ويعيشوا الدور ويعيشوا مشاعر الحب فيستعجلوا وميستنوش الشخص اللي يحبوه بجد و يقرروا يعيشوا الدور وخلاص ويدخلوا في قصه حب وارتباط مع أي حد معدي قدامهم في الشارع ، كل اللي بيدوروا عليه إنهم يحسوا باهتمام أو يتقالهم وحشتني وبحبك ومش قادر اعيش من غيرك
و كلمتين حلوين يسمعوهم يسدوا بيهم الجوع اللي جواهم ، كلمتين حلوين وشخص يسد خانة الفراغ العاطفي اللي حاسين بيه
منتهي الظلم والانانيه وانعدام الضمير انك تتعامل مع شخص علي انه سندوتش جبنه تسد بيه جوعك ، واول ما يجي الاكل اللي بتحبه تركن الساندوتش علي جنب وتسيبه
وفي نفس الوقت منتهي الظلم لنفسك انك متبقاش عارف
ان كل واحد مننا ربنا خلقه برصيد كامل من المشاعر وان مع كل علاقه فاشله أو للتسليه بيدخل فيها بيستهلك جزء من المشاعر دي ويفضل يستهلك هنا وهناك ورصيده من المشاعر بيتاكل يوم بعد يوم لحد ما يبقي مش عارف يحب ولا قادر يحس بحد او بمعني أدق يوصل للفتور العاطفي ساعتها بس بيفوق علي كارثة قد ايه هو ظلم نفسه لأنه مبقاش عارف ولا قادر يحب و بتضيع من إيديه فرصة الإرتباط بحد مناسب أو بيفشل لما يدخل في علاقه سليمه لأنه مش قادر يدي الطرف التاني ده اي شئ
مشاعر غيرك مش لعبه ، احساسهم وقلبهم مش حاجه تتسلي بيها ولا سندوتش سريع تسد بيه جوعك
في ناس سهل عندها تعمل نفسها بتحب وشويه وتنسى لكن في ناس صادقه في حبها مايعرفوش يعملوا كده ، في ناس بتصدق الوعود الكذابه والكلام المتزوق اللي اتقال من شخص ما عشان يعمل فيها حَبيب ويعيش الدور ، بتصدق وتتوجع لما تعرف الحقيقه وحياتها بتدمر وعمرها بيضيع في ناس بترسم طريقها واحلامها بناء علي كلام افتكروا انه صدق وكان مجرد خداع من شخص معندوش ضمير ولا اخلاق
كسر القلب مالوش كفاره ، وجرح روح بريئه كل ذنبها انها حبت مالوش علاج ، وعمر ما ربنا هيبارك ولا يكرم انسان قدر يستغل حب غيره ويستهلك مشاعره عشان يشبع انانيته
اوعي تقبل تكون شخص معندوش ضمير ولا اخلاق بيستغل مشاعر غيره ، واوعي تقبل تبقي سندوتش جبنه يتاخد منه قطمتين ويتساب لحد ما الأكله تجهز

السياق.

نقدم لكم من خلال موقع (الرأى العام المصرى )، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية