الجنحة المباشرة والجنحة الغير مباشرة ( محضر الشرطه)

اعرف حقك مع المستشارة نعمه عباس

تعد الجنحة المباشرة هى الدعوى التى تقام عن طريق المحكمة، وذلك بالادعاء المباشر، أما غير المباشرة فهى التى تكون عن طريق قسم الشرطة، كما تكون الجنحة المباشرة أسرع فى تحديد جلسة لنظر الدعوى، إلا أن هناك عيوبا لها أيضا تضاهى مميزاتها يجب تلافيها من قبل المحامى مقيم الدعوى.

عيوب الجنح المباشرة:

1- فى حالة حدوث مفاجآت غير متوقعة وحصول المتهم على البراءة لأى سبب، لا يمكن للمدعى بالحق المدنى استئناف الشق الجنائى، لأنه هو الذى حرك الدعوى وليست النيابة العامة.

2- بعد حكم أول درجة وحصول استئناف من المتهم ممكن المتهم، لا يحضر الاستئناف بنفسه ويحضر محاميه نيابة عنه، كما تنظر المحكمه القضية بشكل عادى بعكس حاله بداية الجنحة عن طريق محضر الشرطة، وفى حال تم الاستئناف لابد للمتهم أن يحضر الاستئناف بنفسه ويتم التحفظ عليه، وإذا لم يحضر لا تنظر المحكمة للاستئناف وتحكم بسقوط الاستئناف وهذا عيب خطير فى الجنح المباشرة.
3- فى أول جلسة إذا لم يكن محامى المدعى بالحق المدنى مستعد ومعه كافة المستندات الخاصة بالجنحة، قد لا يقتنع القاضى بالجنحة ويحكم ببراءة المتهم.

محضر الشرطة او الجنحه غير مباشرة

ده انك مثلا معاك إيصال امانة وعايز تشتكى به حد بتروح القسم وتعمل محضر وبعدين المحضر بيأخد رقم ويروح على النيابة والنيابة تحقق فى الواقعة وبعدين يحدد له جلسة … طيب والكلام ده فى خلال قد ايه ؟؟ مش أقل من شهرين على حسب ضغط الشغل فى النيابة اللى عامل فيها المحضر … ويجوز حضور المتهم أو محاميه كما يجوز حضور المجنى عليه او محاميه للمطالبة بتعويض المدنى المؤقت .
أما الجنحة المباشرة دى أن المحامى بيقوم بإقامة الجنحة دون اللجوء إلى القسم …!!! يعنى بيكتب صحيفة الجنحة ويثبت فيها مبلغ التعويض المدنى المؤقت والنيابة بتحدد جلسة فى اسرع وقت ويعلن المتهم بالجلسة والدعوى المدنية دون تدخل من النيابة فى التحقيق أو العرض عليها ويقتصر فقط على مجرد إعلان النيابة مثل المتهم … وبتكون الجلسة فى وقت أسرع من محضر الشرطة … يعنى لو محضر الشرطة هيتحدد له جلسة فى حدود شهرين هيبقى فى الجنحة المباشرة فى خلال شهر مثلا .
طيب كده انت هتقول دى حاجة كويسة ماهى الجنحة المباشرة أسرع من محضر الشرطة… !!
هقولك ماهو مش كل الجرائم ينفع تترفع عن طريق الجنحة المباشرة وكمان لو المتهم لم يعلن بالجنحة المباشرة يبقى ساعتها مش حتعرف ترفعها وحتأخد إجراءات أطول من محضر الشرطة كمان . بعكس محضر الشرطة انت كل الى بتحتاجه هو عنوان المتهم فى دائرة القسم اللى بتعمل فيه المحضر وبس يعنى مش محتاج تعلنه ولا حاجة …. ومش كده وبس أهم فرق بين محضر الشرطة والجنحة المباشرة انك لما بتعمل محضر الشرطة المتهم لازم يحضر بشخصه فى الاستئناف أو المعارضة الاستئنافية …
أما فى الجنحة المباشرة فحضور المتهم غير وجوبى فى الاستئناف ويكفى حضور محاميه فقط … وطبعا فى ناس كتير حتخاف تحضر فى الاستئناف بشخصها وتقول طيب ما انا اتصالح احسن بخلاف الجنحه المباشره هتقول انا هخسر ايه خلى المحامى يحضر يمكن اخد براءة ولو اتحكم عليا أبقى اعمل تصالح قدام المحامى العام وده طبعا حيطول الفتره شوية .