كتب/ أحمد الكومي
فنانة ذات وجه سمح وإبتسامة جميلة ، تمسكت بالحجاب خلال عملها الفني ، لنشأتها الصالحة ولكونها حافظة لكتاب الله ، تتميز بالتواضع وخفة الدم والأخلاق الرفيعة .. إنها الفنانة “ميار الببلاوي”
ويسعدنا أن نتعرف عليها أكثر
إسمي/ “منال محمد الببلاوى” والشهيرة إعلامياً ب “ميار الببلاوي” ، تاريخ الميلاد ١٩٧٢/١٢/٢٤ ، ومقيمة في محافظة القاهرة ، وأعمل إعلامية وممثلة ودكتورة في الجامعة
س من الذي اكتشفك كفنانة؟
ج. المخرج الكبير فهمى بعد الحميد
س هل عملك في الإعلانات كان لية أثر خلال رحلة عملك الفنية؟
ج. عملى فى الإعلانات فى البداية كان بوابه لدخولي مجال الفن وكان فترة قصيرة.
س ما هي التحديات اللي واجهتك في بداية عملك الفني؟
ج. أهم تحدى واجهنى هو رفض والدى التام لدخولى الوسط الفنى لكونه من أصل صعيدي مع عدم وجود أى واسطه أو سابق معرفه بأحد فى الوسط الفنى، ولأني خريجة كليه الآداب قسم الدراسات اليونانيه واللاتينيه.
س أية المسلسل اللي حضرتك حسيتي إنه أثر علي الجمهور والشارع المصري؟
ج. مسلسل “بريق فى السحاب” لأنه كان بيتكلم عن عقوق الوالدين بعدها إنهالت عليا عروض سينما ومسرح ومسلسلات أنا والنجم “أحمد السقا” لأننا كنا فى بداية مشوارنا الفني.
س ما هي الشخصية إللي كنتي تحبي تقومي بأداء دور أمامها خلال مشوارك الفني؟
ج. كان نفسى ألحق أشتغل مع الفنانة الجميله “سعاد حسنى” أما على مستوى الممثلين الرجال طبعاً “رشدى أباظه”، وقد أسعدني الحظ بالعمل مع الفنان الكبير “صلاح ذو الفقار” إللي قمت بأداء دور أمامه فى فيلم “ديسكوديسكو” كإبنه له.
س أية الإختلاف بين التمثيل في مصر ودول الخليج؟
ج. يوجد إختلاف كبير فى الخبره الدراميه وأدوات الممثل، بس أعتقد دلوقتى إتقدموا كتير جداً وبقى عندهم إمكانيات وإبداعات ملحوظه، بسي يظل الفن المصرى والدراما المصريه هى الإساس.
س ما هي التحديات اللي واجهتك في الأدوار اللي قمتي بتمثيلها في دول الخليج (السعوديه والكويت والإمارات)؟
ج. أنا مش واجهت أى تحديات فى البدايه نهائى لأني أجيد التحدث بالثلاث لهجات كل على حده بطلاقه كأنني من أهل البلد لكن بعد إرتدائى الحجاب كان بيتعرض عليا أعمال خليجيه فيها مشاهد لابد من خلع الحجاب وكنت برفض تماما.
س أية سبب إعتزالك للفن؟
ج. أنا مش بحب كلمة إعتزالى الفن دى بتنرفزنى جداً ، لأن أنا لم أعتزل نهائياً وتصحيح المعلومه أنا إتحجبت ولم أحتجب لأنى ببساطه كل سنه كان ليا عمل بس المخرجين حصرونى بعد إرتداء الحجاب فى المسلسلات التاريخيه والدينيه إللي يمكن في ناس كتير مش بتشوفها، وآخر أعمالي “ستات قادره” ودور “الحاجه تقى” …
س من الذي قام بتشجيعك للعمل كمذيعة؟
ج. عملى كمذيعه جه بعد إرتدائى الحجاب من خلال قناه إقرأ كتشجيع للفنانات المحجبات على التواجد وبعدها قنوات كتيره زى “المحور” و”العاصمه” و”ltc” وأخيراً قناه “النهار”.
س ما هي التحديات اللي واجهتك بالعمل الإذاعي؟
ج. يادى التحديات مفيش تحديات فى عملى الإذاعي لأنى من خلال حفظ القرآن الكريم كاملاً ولله الحمد، أتقنت اللغه العربيه ومخارج الألفاظ ومن خلال عملى فى المسلسلات التاريخيه أتقنت الإلقاء والتشكيل وإستعمال اللغه فى موضعها، بص هو سهل جداً الممثل يبقى مذيع لأنه ممكن يعتبره دور بيأديه لكن مش أى مذيع يبقى ممثل وأنا ولله الحمد حققت نجاحات مرضيه فى الإثنين.
س ما وجه التباين بين شخصية “ميار الببلاوي” قبل وبعد الحجاب؟
ج. وجه الإختلاف كبير جداً بين الشخصيتين والتباين قليل جداً بس الشئ المشترك قبل الحجاب وبعده هو إعتزازى بكرامتى وحبى للنجاح وثقتي فى الله.
س أية اللي كنتي تتمني تحققيه أثناء حياة أخوكي “علاء” رحمه الله؟
ج. علاء كان أطيب من الطيبه وحنين ورمز للأخلاق وكان نفسى ربنا يمد فى عمره لما ألاقيه واقف جنبى فى فرح إبنى لأننا ثلاث بنات وملناش غيره بعد وفاة بابا.
س ما هي الأمنية إللي بتتمني تحققيها بمجال عملك الإذاعي؟
ج. أتمنى من خلال عملى الإذاعي إنى أكون واجهه مشرفه للمرأه المسلمه المحجبه وأني أشجع بنات كتير على إتخاذ قرار الحجاب إللي فرض على كل مسلمه.
س نصيحة توجهيها للفنانين المقبلين أو الراغبين في العمل الإذاعي؟
ج. نصيحتى إنهم يدرسوا لأن الناس كلها عاوزه تمثل وتقدم برامج بدون خلفيه ثقافيه ولا دراسه فاكرينها مهنه من ليس له مهنه، وكمان فاكرين إن الطريق سهل والفلوس بالكوم بس كل دا مش صحيح، وأتمنى إن أي إنسان مش ييأس ويحاول بس لو توفرت الموهبه ومش هو إللي يحكم على نفسه بالموهبه لازم يتأكد من خلال ناس متخصصه.
س رسالة توجهيها لجمهورك العريق؟
ج. بقول لجمهوري بحبكم ويارب تدعموني طول العمر وتقفوا جنبي وفي ظهري وأنا منكم وليكم ولو في أي شيء أقدر أقدمه لمساعدتكم أنا عمري ما هتأخر عنكم أبداً، ويارب تكونوا بخير وأحسن حال ، وكل عام وحضراتكم والشعب المصري والأمه العربية والإسلامية بخير وأمن وأمان.
