فاصفح الصفح الجميل

كتب. احمد الفضالى

ممكن محدش يكلم حد الفترة دى يعاتبه على أي حاجة !

ممكن محدش يقول لأي حد كلمة ممكن تضايقه !
ممكن محدش يكلم حد غير لو هيقول له كلمة حلوة !

إحنا فى أيام صعبة قوى و كل واحد فيه اللى مكفيه حرفيًا
كل الناس نفسيّتها تعبانة .. كلّها بلا إستثناء حتى اللى بيهوّن عليك و بيضحك معاك ده تعبان برضه و مخنوق و مش عارف يقولك عشان يخفف من عليك ..

اللى فقد عزيز و غالى
اللى عنده مريض أو هو نفسه مريض

اللى معرض للخطر و هو رايح الشغل
اللى خايف على نفسه و على أهل بيته و ولاده

اللى شغله و مصاريفه إتأثرت
اللى مسافر و مش عارف يرجع
اللى ديونه كترت وضغوطاته تكالبت عليه

ربنا وحده يعلم كل بيت فيه إيه
ممكن كفاية نتعب بعض ؟!

لو مش هتعرف تتصل بحد و تتطمن عليه و تكون جنبه و تهون عليه شويه يبقي على الأقل منزودش همّه ..

خليكوا ناس سهلة حنيّنة هيّنة ليّنة قريبة من بعض.