إتيكيت جبر الخواطر من كتاب مملكة الإتيكيت

بقلم هايدي سلامة
متصل الآن …
انا مش بخير… ازاى !!!!!
انت طول الوقت متصل الآن وكنت منزل أستورى فطمأنيت عليك لما شوفتها .حاول على قد ما تقدر إنك تراعي ظروفى ، وتحترم خصوصياتى، مين قال انى لما أتواجد على وسائل التواصل انى كده انا بخير ….
مش لازم يبقوا متاحين لك وقت ما يكون وسائل تواصلهم “متصل الآن ” ممكن يكونوا متصلين شغل ، تعب ، مرض ، حزن ، جبر خاطر لحد آخر، قدر ظروفهم ومواعيدهم ، وبلاش تلوم وتخلي إللى بينك وبينى انك شوفتلى حاله او تعليق انا محتاج أسمع صوتك وأحس أنك فاكرني
حط في عقلك دايمًا إن الخيبات والصدمات من اللي حواليك مش هتنتهي أبدًا مهما مرت السنين.. أنت اللي لازم تغير من عقليتك وتفكيرك وحكمك على اللي حواليك.. وتركز في أختياراتك وتتوقف عن التوقعات العالية علشان تحافظ على قلبك من الكسر
لازم تتقبل فكرة إنه عادي مش كل الناس ممكن تحبك أو تتقبلك.. لأنه طبيعي إنك ما تعجبش كل الناس.. لكن لازم تعجب أهلك وأصحابك واللى جعلتهم فى يوم من الأيام من المقربين لك يتقبلوك بجمالك ويعيوبك.. لازم يشوفوك عظيم قوى ولو فى يوم من الأيام وقعت يسندوك ويقوك .. اللي مش متقبلك واللي بيحاول يكسرك أو يضايقك..ابعد عنه ركز في الناس إللى اعطاها الله لك سند.. وخليك واثق من نفسك وكن أنت الإنسان الراقى إللى بيجبر الخواطر..
ما تنتظرش حاجة معينة تحصل علشان تكون بعدها سعيد.. سلم أمورك كلها لله وارضى باللي كتبه لك وخلي عندك النية إنك تكون سعيد بكل قدر هترزق بيه وهتلاقي نفسك فعلاً سعيد وراضي بكل شيء
السعادة مُعدية.. يعني كل لما تبقى في وسط ناس روحهم حلوة بيجبروا الخواطر ومبهجين وقادرين على إنهم يغيروا مودك كل ده هينعكس عليك وهتحس بسعادة في حياتك وهتتفائل بكل اللي جاي لأن الشعور بيتزرع جواك تلقائي.. فكتر حواليك من الناس إللى بتجبر الخاطر .
أفضل كلمة ممكن تسمعها فى حياتك هى “انا حاسس بيك”
إبدا تعاطفك بأنك تسمعه صح بأهتمام وتركيز ، وتشجعه يطلع كل إللى جواه ، وقوله: ” كمل..” ، “انا متفهم إللى بتمر بيه”، “انا بحاول أعرف المشاعر إللى أنت حاسس بيها .. لحد ما يقولك الشعور إللى بيمر بيه هو ده إللى المفروض يحصل مش نطمئن على بعض لمجرد أنه “متصل الآن ”
حكاية تخص الكاتب عزيزى القارئ
الوالدة كانت فى الإنعاش وفى آخر لحظات حياتها وكان تليفونها متصل الآن …… والمفأجاة انه فضل متصل حتى بعد الوفاة بلحظات
وفى النهاية،،،،،،
أتعود انك متتعودش في حاجات كانت هتبقى حلوة أوي لو كانت جت وقت ما أحنا كنا عايزين أوعي تطلب من حد انه يهتم بيك أوعي تستني حد يسأل عليك وأمسح الرقم اللي مستنيه يتصل بيك‏ علشان ما تصعبش عليك نفسك وقول بأعلى صوت
……انا مش متصل الآن……
………انا مش بخير ………