ماتاخدش كل الذكريات ..
ماتاخدش قلبي ف سكتك ..
سيبلي شويه من الحاجات ..
اللي نسيتها ف غربتك ..
انا كنت أشوف قلبك بعين ..
وغميت عيوني بعتمتك ..
شفت اللي مقدرتش تشوفه ..
حبيت عيوبك ضميت ذنوبك ..
حتى الخطاوى التايهه منك ..
واللي انت نسيتها بقسوتك ..
انا شفت فيها محبتك ..
انا اشتريت ضعفك ووجعك ..
ولعنت كل شئ يوم وجعك ..
خفت عليك كأنك أنا ..
كرهت لحظه اشوف فيها دمعك ..
إزاي بس يوم تدمع عيونك ..
وأنا قلبي بكل دقه يصونك ..
إزاي يوجعوك وأنا سيفك وضهرك ..
هشيل حزن روحك وتفضل بطهرك ..
حبيتك بنورك بتوهة بحورك ..
حبيتك ف لحظة ما يعلى غرورك ..
حبيتك ومسألتش سكنت ليه فيا ..
جايز كان حبك أجمل ما فيا ..
وجايز يكون أوجع ما ليا ..
حبيتك بذكرى سايبها ف وداعك ..
حبيتك وعمر قلبي ما باعك ..
لكنك بسيف شلته يوم لحمايتك ..
جرحت اللي بيننا بكل اقتناعك ..
ورغم اللي كان ووهم الامان ..
بقولك حبيتك وبحبك كمان ..
وهفضل على عهد قلبي اللي صانك ..
برغم إن قلبك خالفني وهان ..
