الرئيسية

الفنان “حسان العربي” : الناس بينادوني ب “ستاموني” في الشارع المصري

الرأي العام المصري علي جوجل نيوز

الفنان "حسان العربي" : الناس بينادوني ب "ستاموني" في الشارع المصري 3

بقلم/ أحمد الكومي

فنان مجتهد وعاشق للتمثيل، هادئ الطباع، بدأ مشوارة الفني أثناء الدراسة بالجامعة، وقام بتقديم العديد من الأدوار بالتليفزيون ومنها، سلسال الدم، سوق العصر، ومزاج الخير،
حكايات وبنعيشها، فريسكا….، وقام كذلك بالعديد من أعمال السينما ومنها صعيدي في الجامعة الأمريكية، وطباخ الريس، والزمهلاوية… إنه الفنان “حسان العربي”ويسعدنا أن نتعرف عليه أكثر…

إسمي /حسان العربي، الشهير بإسم “ستاموني” وده كان إعلان، مكان الميلاد القاهره، أنا خريج كليه تجاره ثم بعد ذلك تخرجت من كلية آداب قسم تمثيل وإخراج جامعه حلوان، ومقيم في المنيل وأعمل ممثل

س مما تتكون أسرة الفنان حسان العربي؟
ج. أسرتي تتكون من زوجتي وولد وبنت

س من الذي اكتشفك كفنان وقام بتشجيعك بالعمل التليفزيوني؟
ج. بالنسبة لمين اللي إكتشفني والله الموضوع كبير لأني قمت بعمل مع الأستاذ “مصطفي الدمرداش”، وكان في عمل مع الأستاذ “فهمي الخولي” في مسرحية وكان معانا الفنان الكبير “أحمد بدير” والفنانه القديرة “هالة فاخر”، والفنان “سعيد عبدالغني” رحمة الله عليه، وكان في أعمال كتير وبعدين قمت بعمل دور مع الفنان “حسين الشربيني” رحمه الله، والمخرج “محمد عبدالمعطي” علي مسرح السلام فكان في العديد من الأعمال، والإكتشاف جه إني كنت بشتغل بصفه مستمرة في مسرح الجامعة، لأننا كنا في الفترة دي في جامعة القاهرة كان في جيل كبير من طلاب كلية التجارة كان فيها “خالد جلال” و”فتحي عبدالواحد” و”هشام عطوه” و”هاني رمزي” و”سليمان عيد” و”محمد عبدالوهاب” و”ماهر صلاح الدين” و”فتوح أحمد” و”محمد الصاوي”، وكنت أنا من الناس اللي بتخلص الجامعه وبنقعد نتعلم من الناس اللي موجوده تاني الناس القديمة، فاتعلمت منهم حاجات كتير واتعلمت حاجات كتير من الفنان “أحمد بدير”، واتعلمت منه حاجات كتيرة أوي وكان أغلب المسرحيات اللي بالجامعة من إخراج “صلاح عبدالله” وأنا إتعلمت منه حاجات كتيرة جداً وكان بيجي لنا الأستاذ “شاكر خضير” رحمة الله عليه، وكان بيجي مجموعة كبيرة جدا وكنا بنتدخل مسابقات والحمد لله حصلت علي أكثر من مره علي ممثل أول بجامعة القاهرة وتوالت الأعمال الفنية بالشكل ده.

س ما هي التحديات اللي واجهتك في بداية عملك الفني؟
ج. التحديات اللي قابلتني كتيرة جداً وصعوبات لأن مكنش بالوقت ده في إهتمام من الشباب بالتمثيل أو الممثلين، وكنا برضه بنشتغل وكان في صعوبة واحنا بنتنقل بين شركات إنتاج والتليفزيون والحاجات دي فكان في صعوبة شوية، وكان في الوقت ده كان مين يعرف مين ومين يشغل مين ودي برضه كانت تعبانه شويه وكانت تعباني أنا شخصيا لأن كان عندي الموهبه وكنت بشتغل ولكن الحمد لله كنت باعمل أي عمل مهما كان الدور ومهما كان حجمه وكنت باعمله بإخلاص شديد جداً وكان بيعلم مع الناس وكانت بتذكرها في أي فيلم او أي مسلسل بيخرجوا منه.

س أية المسلسل أو الأعمال اللي حضرتك حسيت إنها كانت مؤثرة علي الجمهور والشارع المصري؟
ج. ملسلسل “مزاج الخير”، ومسلسل “ريا وسكينه” كان مؤثر مع الناس وكانت الناس بتتكلم عليه، وكان في فيلم “شجيع السيما” وكان ليه تأثير، وكان في مسرحية “جوز ولوز” إخراج الدكتور “هاني مطاوع” وكان في حاجات كتيرة اتعملت وكانت مأثرة مع الناس ومن خلالها إتعرفت علي ناس وكان من خلالها إني غيرت المجال شوية وعملت إعلان “بحبك ياستاموني” وده كان ليه رد فعل قوي عند الجمهور، وده لحد دلوقتي الناس بتناديني بيه يمكن ما يعرفوش “حسان العربي” ولكن يعرفوني “بستاموني” ولو اتكلمت عن “ستاموني” الناس يقولوا أه عارفينه.

س ما عدد المرات اللي حضرتك إتكرمت فيها؟
ج. اتكرمت في حاجات كتير بأكتر من مجال والحمد لله، خدت شهادة تقدير ودرع وحاجات خاصة بالمحبه والسلام، والعطاء الفني واللجنه الثقافية، ومن نقابة المهن الفنية للدكتور “محمد ابراهيم” من خلال هيئة المسرح، وتم تكريمي كذا مره ومنها تكريمي بدولة “الجزائر” وفي تونس بمدينة قرطاچ وحصلت علي شهادة تقدير والحمد لله.

س من الشخصية اللي حضرتك تحب تقوم بدور معاها؟
ج. أنا ما اشتغلتيش مع الفنان “عادل إمام” وكنت أتمني أشتغل معاه، ربنا يديه طول العمر ويعمل لنا حاجة جميلة في رمضان الجاي وأكون معاه، واللي اشتغلت معاه كتير وليه فضل عليا وأثر فيا الفنان القدير “أحمد بدير” ورشحت من خلاله في أكتر من عمل واتعلمت منه كتير أوي.

س ما هي الأمنية اللي بتسعي وبتتمني تحققها بمجال الفن؟
ج. إني أعمل دور وأظهر أكتر من كده ويكون ليا تأثير أكتر علي الناس عشان يكون ليه رد فعل كويس عند الناس ويكون ليه رد إيجابي عشان أنا بحب الحاجات الإيجابية أوي، يمكن برضه عملت عمل مع الأستاذ “محمد داؤد” كان ليه رد فعل كبير عند الأستاذ “فؤاد المهندس” رحمه الله، وكان قالي بأحد الأيام إنت فنان جميل جداً ووقفتك علي المسرح جميلة جداً وان شاء الله يكون ليك مستقبل جميل

س هل تؤمن بالموهبه ؟
ج. الموهبه أساس أي عمل فني وأساس للفنان لأن الفنان لو معندوش موهبه مش هيعرف يشتغل وبتثقل الموهبه بالدراسة لأن الدراسة بتتديك ثقافة أكتر.

س ما هي الأسماء التي ظهرت علي الشاشة وحضرتك شايف إن ليهم شأن عظيم بالعمل الفني؟
ج. في أسماء كتيرة ظهرت مش عاوز أذكر أسماء عشان مش أنسي حد، وبتمني ليهم التوفيق وربنا يوفقنا جميعا بإذن الله.

س رسالة توجهها لجمهورك خلال تلك الآونة؟
ج. بحبكم جداً وعاوزك دائما تساندوني وربنا يقدرني واكون عند حسن ظنكم وكل عام وأنتم والشعب المصري بخير بمناسبة إنتصارات أكتوبر المجيدة.

Loading

اظهر المزيد

مقالات ذات صلة

زر الذهاب إلى الأعلى