الرئيسية
وعجبي
بقلم: نقيب/ خالد عفيفي
أعمل أية معاكى يا دنيا
إحتار دليلى وحيرتينا
نتولد فيكي صغيرين
تسلطي أيامك تكبرينا
أيام تضحكى فى وشنا
وأيام تسودي فى عينينا
أيام تزفى الأفراح
والبهجة تملأ ليالينا
ونعيش ليالى الملاح
وتعشق الليالى اغانينا
أيام يا دنيا تريحينا
وأيام بالقسوة تشقينا
ونرمى الأحمال على كتافنا
وفى عز الشباب تشيبينا
وأيام تدينا كل حاجة
وفجأة تقسي علينا
ترضى علينا تهنينا
وتقلبى علينا تبكينا
تفتحى ذراعك تضمينا
وتحققى كل أمانينا
وتدينا ظهرك تخاصمينا
وللحوجة تسلمينا
أيام تبقى حنينة
ولو ملنا تسندينا
وأيام تبقى فى العالى
وفى لحظة تغدرى تبكينا
كل يوم فى حال يا دنيا
وعمال تلعبى بينا
ليه مافكيش الأمان
ومن بكرة بتخوفينا
هبيعك بالزهد يا دنيا
لا انشغل بيكي
ولا تشغلينا
وأدعو من ربنا يا دنيا ما يسلطك علينا
وعجبي
